واش قالو النسا في الجزائر على طريقة تربية الأطفال الذكور واختلافها عن تربية البنات
سلام امهات
حبيت نحكي على الأم الي عندها ذكور والي عندها تجربة وطرق اتبعتهم في تربيتهم من جميع النواحي اعطونا من خبرتكم أو من خبرة أمهاتكم.
Amina : عندي زوج قد يكبرو تكبر المسؤلية معاهم ولازم تصحبيهم اكثر حاج الوقت ميرحمش وتعرفي شكون صحابهم ثانيت وربي اقدرنا على تربيتهم يارب
Hanine : تربيه طفل واعرا وكلما يكبرو تكبر مسؤوليتهم نشالله يترباو على الصلاة والطاعه هاذا هو شي لي يبعدهم على طريق الفاسدا.
Nadjet :عندي 2 الله ابارك عليهم مصاحبتهم يحكيولي على كلش واسقصيوني بلا حشمة في اي امور و وقت صح نعاقبهم و نعيط عليهم وقتي لكل ليهم ربي اخليهم ليا.
Batoul :انا مثلا ام لطفلين وبنت الاولاد الذكور ماتعبونيش كيما بنتي خطراش باباها دللها وحصلت فيها 😤😤😤 وانا بطبعي ام عصبية وحازمة ولادي ربيتهم على الرخا والشدة مع العلم ابني لكبير من ذوي الاحياجات الخاصة (عندو تأخر ) وابني الثاني عادي سليم والحمد لله مثلا لكبير نعاملو كأنو مش مريض عادي يلبس وحدو ويغسل وحدو كل حاجة يديروها وحدهم حتى فراشهم يفرشو وحدهم وفي بعض الاحيان نرتحهم باش مايملوش كي نكون مريضة يعاونوني في شغل البيت نقلهم ديروهكا وهكا يديرو يعني نعطيهم بعض التعليمات وهومة يحاولو يتبعوها مش لاني مش قادرة بصح باش نعلمهم يعتمدو على انفسهم الدنيا هذي غدارة مايعرف لواحد وش مخبيلو القدر نقول لازم نربيهم باش مايكونوش عالة على حتى حد والحمد لله على كل حال وكي يجيني ضيف نقلهم ما تجوش تقعدو معاه في الطابلة كي يخرج نحطلكم كيما حطيتلو هوة وبالفعل نحطلهم وهكا راحت فيهم طبيعة حتى كي نخرج واحد ما يقلقني ولا يجي قدام الناس يطلبني مثلا يجيني ضيف نقلهم ماتهدروش معايا وماتطلبو والو قدامو حتى يروح والحمد لله نديرلهم كل لي نفسهم فيه باش مانبانش كذابة في نضرهم الحيات اليومية نعيشها معاهم كيما الناس كل عياك تعاريك مرة نرخي ومرة نشد ومرة نتجاهلهم وساعات نخليهم يديرو رايهم فا النهاية يبقو اطفال ماعندهم وين يروحو لازم يخرجو الكبت علابالي طولت ومزال كاين ياسر حكايات غير لازم نحبس باش تقدري تقري تعليقي ربي يهديهم ويقدرنا عليهم وشكرا.
Khadija :صاحبيهم وبينيلهم انك عارفة وش يدور في روسهم تبقى ديما عندك هيبة عندهم متبينيش ضعفك قدامهم يجوك حاقدين وخليهم ديما تحت عينك وخاصة كيدخلو سن 10سنوات وربي يكون في عونك وعوني.
Om Fatah : بنت عمي عندها ربعة بسلامتهم عون ليها في كتافها معلمتهم النظام والنظافة لقاتهم في كتافها مشاء الله ربي يفرحها بيهم ديما متفوقين في دراستهم.
Lamia: عندي زوج حمد الله ضركا عادي مي نخاف يكبرو وماننجملهمش البنت تقدري تخليها فالظار وماتخرجش غير معاك ولا تقرا مي الولد ادا حكمتيه فالدار ماشي مليح وادا خليتيه يخرج ماشي مليح هادي الحاجة ديما تخوفني.
Joujou : الجيل تاع ذوك ربي يستر خليهم دايمن يخافو من ربي (واعلم انا الله يراك )وربي يقدرنا عليهم ويجعلهم من الصالحين.
Mariem : انا عندي 3 ذكور واحد 13 واحد 10 وصغير 5سنين هذا وين بديت نترقع وبسلامتهم خفاف منخرجش بزاف علا جالهم تلحق القراية انا نقريهم متبعتهم سورتو الكبير تربالي خفيف مازال هو اللي مغلبني بصح يصارحني واش يصرالو مخليتش مسافة بيني وبين أولادي غير يدخلو يحكولي واش دارو وانا نصححلهم اذا غلطو منبعد نعطيهم ساعة يريحو منبعد نراجعلهم واذا عندهم واجبات نعاونهم ونسقسيه على درس اللي دارتولو المعلمة ونحاول نشوف اذا فهم واذا مفهمش نعاودولو فى دار .
Dima:عدنا جارت عجوزتي عندها 7 ولا 8 ولاد كانو يعاونوها في كلش في ماعن وحوايج تسياق درك مزوجة خمسة والباقي مزالو ربي يقدر كل وحدة تربي.
Hadjer:عندي ثلاثة و الرابع فالطريق صراحة تربية نفس الجنس صعيبة يعني كامل ولاد ولا كامل بنات يتغايرو على كلش حتى و تكوني انتي موفقة بيناتهم يلقاو حاجة لي يتفاتنو عليها .تشري لعبة تقولي العبو مع بعض يجيبولك سبة هادا لعب كتر و انا لالا .ربي يكون فالعون.
Jamila:كل شيئ يبدا من الصغر واحسن معاملة هي تعودي تجبدي ليك ولادك من الصغر وتعامليهم معاملة الصديق يعني من جهة القدر والاحترام ومن جهة انو يحكيلك كل شيء وما يخبيش عليك وتعوديهم النقاش والتحاور والثقة.
Zahra: تلاقيت مع وحدة عند الطبيبة عندها ذكورا كبار قاتلي ربيتهم ماشاء الله يقراو مليح و متربيين و مصليين بصح قاتلي غلطت غلطة ماعلمتهمش يعاونوني ...توصي فيا و تعاود لازم تعلميهم من صغرهم يعاونوك و ماشي عيب الطفل يعاون ماماه.
Fatima: تربيتهم صعيبة كي يبداو يكبرو اعرفي لي راكي منتقلة لمرحلة مغايرة من حياتك سيرتو كي تولي اغلب الوقت انت لي واقفة عليهم ربي يعيننا ويقدرنا ويصلحهم يارب.
Salima: نقلك نصيحة وحدة علميهم يعاونوك و ينظفو فوضتهم يرتبو امورهم.
Karima: تعرفي الصلاة قولي لوالدهم يصلي بيهم جماعة يوميا يتعلمو.
Wafa:الام لازم تكون قريبه لاولادها في كلللل شيئ وين القى فرسه تتحاور معاهم في كلش تحكيلهم ذكرياتها وتوريلهم تصاور وتحكيلهم على كل صوره وتضحك معاهم واهم حاجه عمرك ماتكذبي على اولادك كيف يقرب للمراهقه وين تسمعي حادث تناقشي معاهم وحذريهم وخليهم قراب لباباهم وكوني أفضل صديقه لاولادك احضنيهم باش يحسو بالأمان قوليلهم بانك تستني يكبرو يولو مسؤولين عليك علميهم النظافة الشخصيه بمجرد ماتتغير أجسامهم لانك انتي اولى من الغرباء يعلموهم وانشاء الله ربي يصلح حال وليداتنا.
Amiina: عندي زوج توأم العكس تاع بعضاهم في كلش الحاجة المليحة في واحد العكس عند خوه والعكس صحيح ضرك عندهم 10سنين أنا بانتلي هذا وين بدات تصعب الحالة معاهم بداو يحوسو يفرضو رايهم وساعات يسمطوني في الصغر مكانوش هكدا وأنا المخاوف تاعي بدات تزيد سيرثو على الصلاة يبداو يصلو ومبعد يجيو يقولولي نجسنا حاشاكم في المدرسة و القراية والفو فيا كون منجبدلهمش ميجبدوش وحدهم مع العلم أنهم يجيبولي مليح 9و8 ربي يقدرنا وخلاص.
Basma:الاولاد والبنات لازم تصاحبيهم وتحسيهم بلي راكي صديقة وتسمعيلهم وتنصحي والا راح يلقاو شكون يسمع ليهم لكن لن يكون ناصحا.
Souhila: التربية ماشي فيها تفرقة بين الطفل و الطفلة مي كل طفل و الشخصية ديالو كاين لي رزين مايسحقش تزيار بزاف تصاحبيه و كاين لي لازم تزيار بزاف و المراهقة لازم حضور و صرامة الاب سينو في زوج يسحقو الحنان.
Amel:كثرة الدلال للذكور للاسف أمر سلبي جدا .. .مجتمعنا ذكوري ويقولك خليه يغلط لأنه ولد .هذا لي يخلي الام و الاب يتهاونو في تربيته ويأثر سلبيا في مستقبل الطفل والمجتمع ككل.
Wissam: الذكر ربيه على اساس انه مشروع رجل.
طفلي عمره سبع سنوات هل من نصائح لكي يجتهد في الدراسة
ردحذفمرحبا...
حذفحببيه في الدراسة،
اجعلي من أوقات المذاكرة متعة له
ابتكري أساليب يحبها طفلك حتى يتعلم بواسطتها
كأن يستعمل الرسم والالوان والتخطيط
لا تحرميه أوقات اللعب ومشاهدة كرتونه المفضل
اتبعي اسلوب تقديم الهدية إن هو تحصل على معدل ممتاز
تابعي تعليمة واكتشفي نقاط ضعفه وساعديه على تجاوزها
اتصلي بمعلمته كي تحيطك علما بمستوى ابنك في المدرسة.. بالتوفيق لك ولابنك