واش قالو النسا في الجزائر على أحسن طريقة لتخضير حلوىles macarons مع أهم نصائح وأسرار نجاحها
سلام حبيباتي من فضلكم اعطوني طريقة نخدم بيها لي ماكارون les macarons تكون ناجحة وايضا نصائح وأسرار لي تخليني مانفشلش فيها بليييييز.
Hiba: هاكي ختي لاغوسات وادعيلي
60غرام كوكاو مرحي مليح
60 غرام سكر ناعم
45 غرام بياض بيض
60 غرام سكر عادي
ملون
نخلطوا الكوكاو مع السكر ڨلاصي و نرحيوهم فرحاية تاع القهوة مليح تخرجلنا بودر لازم
نطلعوا بياض البيض و نزيدولوا السكر نطلعوا حتى يتماسك مليح و يشكل منقار نزيدو الملون آبخي نهز شوية من الخليط نديروا فمسحوق الكوكاو و السكر و نضيف بشوي و نخلط
فالصينية بلابوش نشكلوا دوائر نريحوه ساعة حتى يشكل طبقة كي نمسوا الحبة بيدينا متلسقش نكونوا مسخنين الفور نطيبوهم ربع ساعة .
Soumia: مالازمش تفتحي عليهم العفسة انك تفتحي شوي برك مش كامل و تخليهم يبردو تم فلفور مباعد تخرجيهم
Hadjer:وصفتي المعتمدة
50 غ بياض بيض
50 غ بياض بيض أخرى
150غ لوز مرحي
150غ سكر غلاص
150غ سكر عادي
50غ ماء
مغرف سكر عادي
ملون (لازم جال او بودر)
اول حاجة نرحيو االلوز مع سكر غلاص ومانرحيوش بزاف باش مايطلقش لوز زيت تاعو...كي. يترحى غربلوه مليح وزيدولو 50 غ بياض بيض اللولة و. ملون وخلطوهم مليح ...و مبعد حطو الماء في كاسرونة وزيدولو 150غ سكر عادي وحطوهم فوق نار يغليو حتى يوصلو 117 درجة و في نفس الوقت طلعو 50 غ بياض بيض الثانية حتى تولي ثلج زيدولها مغرف السكر على دفعتين و كي يطيب السيرو صبوه عليهم بشوي كي لخيط وبقاو خلطو حتى يبرد لمورنغ ...كي يبرد تجي مرحلة لماكاروناج ..تحطو الميرانغ على خليط لوز على 3 دفعات حتى تتأكدو بلي تخلطو مليح ولزم تخلطو في نفس الاتجاه ديرو دورة كاملة و من غير فراغ في الوسط حتى يوولي الخليط كي تديري بيه خط يبقى الخط يبان و مبعد تبوشيوه بشكل عمودي و كي تخلصو اخبطو لبلاط تعكم 5 مرات ولا 6 و مبعد تجي مرحلة لكخوطاج خليه يشيح نصف ساعة و هنا شعلي الفور على 150 درجة يطيب 15 دقيقة
(لازم فور فونتيلي ولا كان كويزينيار ماش فونتيلي طلعي. شبكة لفوق و ديري 2 بلطوات وباب الفور متقفلوهش خلاص كاليوه بمغرف حطب)
متحلوش عليه حتىى يفوت 15 min.
Mimi:الفور لازم يكون الباب تاعو مشقوق كي تكوني طيبوهم ولا كان عندك فور ventilé.
Amira: السر باه ينجحولك لي ماكارون هو كي يطيبو ماتخرجهومش من الفور خليهم تما 5 دقائق و من بعد افتحي باب الفور و زيدي خليهم تما حتى يبردو تماما .. يتنحاو ساهلين و تلقايهم حاكمين روحهم ...
الصح في الاخفاقات كامل فتنا عليهم😁💪
Rima: شوفي poché les macaron تاعك خليهم ينشفو حتى كي تمسيهم ما يلسقوش في يدك
تما ديري un plateau تاحت le plateau لي درتي فيه les macaron و حطيه الفوق كاامل فالفور و نقسيلو لطرف و خلي الفور مشقوق يعني ما تغلقيهم
يطيبو 15 min و كي يخرجو خليهم يبردو باش تنحيهم.
Nassima:انا نطيبهم في فور عادي تاع الغاز و لانو قاوي نشعل قبل ما نبدا نخدم و كي نلوحهم نطفيه هكذا يطيبو و مايتحرقوش...و قبل ما نلوحهم لازم يكونو ناشفين من لفوق.
يعني قبل مايدخلو للفور لازم ينشفو يعني كي تمسيهم من لوفق تلقايهم نشفو تقريبا نخليهم نص ساعة و من قبل ما نبدا نخدم نشعل الفور يسخن مليح أنا راني نهدر على كويزينيار تاعنا قاوية يعني تسخن مليح علابيها كي ندخلهم نطفيها جربت قبل نخليها شاعلة يتحرقو.
Lamis: المكارون يتخبو مش لاصقين و عادي المدة حتى لو طويله كي تخرجيهم يبقو كأنهم جدد المهم تكون بواط مليحة.
Fatima:بعد متشكليهم فبلاصتهم تخليهم حتى لساعة وهما هكذاك بش ينشفو قبل متدخليهم يطيبو.
Hadil: شوفي لي روسات تاع لي شاف فرونسي ختي هوما لينجحو سييت روسات تاع وحدة هنا خرجولي يعيفو حشاك كي سييت وحدة تاع شاف فرونسي خرجتلي هايلة .
Nadjet :من بين الوصفات لي مقررة منريسكيش ونديرها فالدار ههههه نسخف عليهم نشري. باسكو قليل وان يصلحو لي يديرهم فالدار..
Imane: ماتحليش الفور كي طيبي...وكي تطفي عليهم حلي الفور مدة 10 ثواني وعاودي اقفلي عليهم 5 دقائق أخرى ومبعد اجبديهم ساع.
Nabila: لازم تخليهم ينشفو قبل ماتدخليهم لفور وادا لفور تاعك مافيهش مروحة تخلي باب الفور مفتوحة شوية.
لا يوجد تعليقات
أضف تعليق