أفضل ‏منتجات ‏وخلطات التنظيف التي تستعملها ‏المرأة ‏الجزائرية

واش قالو النسا في الجزائر على أهم منتجات وخلطات التنظيف الفعالة 

سلام عليكم الحراير 

حبيت نسقسيكم بحكم انا راني عروسة جديدة ومعنديش دراية بالمواد التنظيف بزاف 

كل وحدة تحطلنا كاش برودوي وتقلنا فواش نستعملوه راني نشوف بزاف مواد تخدمو بيهم 

وشكرا مسبقا.

Taouba: خلطی ثلاث مغارف كبار كریستو و كاس خل ثلاث مغارف كبار غسول الاوانی و زوج كیسان ما ساخن .. هذي الخلطة تساعدك في إزالة البقع الصعبة من الأرضيات .

Hassina: القرعة الارونج فورس اكسبراس نستعملو للدهون للمعان والكوزنيار والفور، وصانيبو امير للتسياق اختاري اللون الابيض ريحتو تهبل وكاين البنفسجي تاع الخزامة ثان شباب وفورس اكسبراس الازرق للفايونص في الدوش وكاين برودوي للخزانة للشمبرة الكل وتاع الزجاج وحدو ثان ومعطر الجو كي تكملي تسياق الخزامة ريحتها شابة

Om takoua:مبروك اختي ربي يهنيك

بينقو لغسيل ملابس مليح بزاف و ريحتو روعة جربيه و متندميش 

صانيبو الامير يعجبني الازرق ريحتو هايلة

فورس اكسبراس القرعة الانورنج تستعمل لغسل الكوشة جربتو لماعن كما كيكوط و برم مرة الاولة عجبني بصح شهبلي لماعن مننصحكش تغسلي بيه لماعن

اكسيو حبيبات لتوالات انا منحبوش نحك بالجاكس و عندي جافيل خير منو 

متكثريش مواد تنظيف بزاف خليها لروتينات اسبوعية و شهرية باه متضركش

Nabila:صابون السائل للملابس انا نستعمل نورمال ومعطر الملابس كي تجي تشليهم ديريه في الماء الحوائج يبقاو ريحتهم شابة بزاف

Nadjah:وكاين نضاف تاع المرحاض هاربيك وكاين واحد تجي قرعتو ارونج ودايرى كما تاع الجافال رخيص كي تصفار وديريه ترجع بيضة ناصعة

Om loudjaine:اذا دارك بنيان جديد أخطيك من مواد تنضيف القوية راح تخسرلك كامل الفايونص استعملي ازيس برك وماتخليش الاوساخ تتراكم واذا تراكمت عليك وعلى جافيل مع الازيس وتسياق أمير مليح برك اذا عندك فايونص كي حالتي راح تقعد الارض مضبة شوية

Samiha: نشري صانيبو أمير الابيض وفورس اكسبرس البرتقالي للكوزينة فايونس وتاني نديرو في لابلاك شوفونت ينقي هايل وفوس اكسبرس الأزرق ينقي العيون يرجعو  يشعلو  بصح ماعجبنيش بزاف كي نديرو في لافابو  ونستعمل نضاف لافابو وتولات وحتى فايونس في دوش يرجع يشعل بالاكي برك العين يشهبها ويخسرها

Karima:انا الأواني نستعمل بريل ازيس ڨولد يدير 25 الف هايل والجافال براف باين لومو للقش نتاع اليد اريال ونتاع لا ماشين بينڨو لتنظيف الأراضي أمير كلين لزرق هايل وصانيبو اوسي أمير كلين نشاله نكون افدتك لحبيبة 

Kaneza:امير هايل و فورس اكسبراس تاع الدهون فور و بريل ازيس للماعن انا نحب منتجات فورس اكسبراس كامل هايلين

Dalal: ندير جافيل امير الموف وازيس ونشلل مليح وفي بيدون التنشاف النشافة نظيفة  ونمسح بيها الارض تخرج تلمع والريحة تهبل.

Dima:لتنظيف الارضية لي مافيهاش البقع متراكمة وأيضا لتلمعيها 

 LAVE SOL انا نستعمل امير تجي تلمع 

Om Rama:الزرابي الغسلة لولة بالصابون عادي شلي ومن بعد الغسلة زاوجة بسائل الاواني وشلي مليح يخرجو يبريو ولا استعملي العملاق 

le chat liquide هايلين 👌👍

Yamina:احسن برودوي للتسياق جل البتراء ينقي يلمع الارضية وريحة تهبل بالاخص تاع لخزامى والاهم يقضي عالحشرات النمل مايطيش معاه تضربي شحال من طير بحجر واحد

Mira:الزرابا انا نغسلهم بالقالب السائل ريحتو مليحة ومايشهبهم المهم ماتغسليهمش بالاومو يشهابو ويقدمو بالخف

Habiba:أمير+صابون الحجرة ربيه+ماء دافئ وحكي الأرضية 

Farah: الزرابا اي التابيات نرغويهم بالصابون الطرف والماء سخون من بعد  نشللهم ونحطلهم ايزيس تاع الماعين معا شوية صانيبو امير كلين  الصابون ينقيهم وايزيس تاع الماعين ينحي ذيك الشهبة  يخلي فيهم ريحة تهبل وحتى كي نشللهم نحطلهم شوية صانيبو 

Afnane:لتنظيف الفايونس استعملي برودوي اسمو الباخرة مجرباتو في لواعر.

Om Djannah:ديري كرسيتو مع الملح والخل في ازيس ليتغسلي بيه ونظفي بيه البقع الصعبة على الكرلاج

Radhia:

Djamila:فورس اكسبرس الازرق لدوش والبرتقالي للمطبخ وللحمامات نظاف جل هايل.