واش قالو النسا في الجزائر على أهم الحلول والنصائح لما يكوت الطفل عنيد والأم عصبية..
طفل عنيد وام عصبية ما تحليلاتكم
Sabrina :الأم العصبية هي لي تخلق طفل عصبي و متمرد عن تجربتي لازم نكبر قلبنا على جالهم و نبعد على الضرب اكبر الدكاترة يقولو بلي الطفل الحركي و العنيد ولي يحب يمشي كلمتو راه طفل سوى وذكي في المستقبل انتم الاباء لي تحولو هذه النعمة الى نقمة بسوء التعامل معهم ربي يقدرنا و يغفرلنا باه تضرب طفل عمرو 3 سنين كارثة و أنا نديرها 😭😭
Hafidha :حنا مدبينا ولادنا نعاملوهم بلحنانة بصح لترقد روطار ومنين تنوظ الشغل الطياب الف حاجة تخمم فيها المصروف الدار الخ.. والخرجة ادا والات عام وتناش شهر في الدار و الروتين واش راح يخرج منها غير الزعاف بعدا كمتلقاش ليفهمها ربي يطينا الصبر ودراري ربي يسجيهم
Rahma :الأم العصبية خلقت طفل عنيد للأسف المشكل في الأم و ليست في الطفل
Kamar :الام لازم البرود التام والحنيه الكثيرة والكلام الطيب اللي يرفع من معنويات الطفل فقط العقاب بطرق صحيه
Lina:الديفو مش فالابن لانو تصرف طبيعي صغير و يحب يسيطر و يجرب كلش المشكل راهو فالام هي تعرف كفاه تتحكم فالوضع و تكالمي روحها علاجال نفسية ولادها لازم يكون بالك طويل وقلبك كبير به تقدري تكبريهم ف جو ملائم مدام الحيلة تربحي بيها اي انسان...
Galia :وضعي. والله الحين صليت الفجر وكنت ادعي ربي يهديني على أولادي ويصلحهم ويهديهم. تعبت نفسيتي معاهم ورجعت عصبية كثييير
Mariem : إنتي لكبيره ولازم تتحكمي في أعصابك وحاولي تفهميه بالكلام وإذا كمل عنادو خليه مشي رايك في بعض الامور ضرك وحدو يتفهم ويرجع مثلا يقلك ندي هذيك وأنتي تقلي لأ يعني لأ يبكي يدير وش حب يولي ليك وحدو ويكون مقتنع أنا هكا ندير يجيوني ويوليو هما يفسرولي ماما مباعد نكلها ماما مش ضرك نلعب
Batoul :الأم لازم تتحكم في روحها و متنارفيش روحها على جال النفسية تاع ولادها و لازم تتعامل بالحنانة معاهم و تكبر قلبها على جالهم
Karama :كي تروح عصبية الام يروح عناد الطفل والعكس كلما تزيد يزيد العناد
Lamia :النتيجة : مراهق شخصيته ضعيفة لي جا يدير فيه ما بغى.. طفل يكذب بزاف.. طفل خواف.. أو العكس. : مراهق عنيف و متمرد و مدمن مخدرات و سراق و لا يهتم لكلام امه و ممكن حتى يكون عاق الوالدين!.. و ملي نشوفوه هاكا نقولو علاه ؟ ننساو بلي هو اصلا كبر هاك!
فكري لمنبعد و شوفي انت الحل الأنسب!
هذشي مايعنيش انه لازم تكون ملائكة.. كلنا بشر و تجي للحظات لي تفقدو فيها السيطرة على رواحنا و نغلطو بسبب ضغوطات الحياة.. و لكن انه يوقع هذشي مرة مرة ماشي كيما كي يكون يوميا او بشكل مستمر
Yasmina :ادعي في صلاتك يعطيك رب الصبر والعقل والله تتبدلي خلاص عن تجربة
Jasmine :وليدي هكذا سييت معاه كامل الطرق ومانجحتش حتى وليت هاااادية معاه ونهدر معاه كيما نهدر مع واحد كبير ونكلخلو نقولو انت هو الراجل نتاع الدار وانت صاحب باباك انا راني تاكلة عليك وكي يغلط مانضربوش وليت نهدر معاه بالعقلية ونصيحة مني ليك عنقيه بزاف وبوسيه قوليلو توحشتك عنقني وانا نحبك وانت وليدي حنوني وان شاء الله ربي يهديه ويفرحك بيه
Samira :العناد ضروري قبل خمس سنوات، إذا مكانش الطفل عنيد يعني هناك مشكل، العنيد يتعلم يقول كلمة لا لكي لا يكون خاضع مستقبلا يعني اللي يطلب منو حاجة يقول نعم ، وكيما يقولو الريح اللي جا يديه، العناد يبني شخصيتو ، فقط لازم احتواء العناد، يعني نقلل قدر المستطاع من الاوامر، ونستعمل الخيارات معاه، مثلا تاكل الان ولا بعد نصف ساعة، تلبس هاذي ولا هاذي وتختاري فقط الملابس اللي راكي حابة انت يلبسها، وماتقوليش أرواح تاكل، بل أرواح ناكلو، أرواح نرقدو
Hala :ديري تحاليل الغدة الدرقية والفيتامين دال
وكذلك أقراص منع الحمل شوفي طبيب وبعدها طبيب نفسي بلاما تنسي قراءة القران والذكر (ألا بذكر الله تطمئن القلوب )الله يشافيك ماشي ساهلة
Khadija :غضبك ليس بسبب الأطفال، غضبك من شخص آخر يجعلك سريعة الاشتعال أو ربما من ضغط الحياة، حاولي تنظمي وقتك و تضبطي ولادك و لي راه يديرلك في المشاكل توقفيه عند حده.
Mariem :كلنا نتعصب و نكون تحت الضغط و أول من نصب فيه الغلط هم أبناءنا ‘ و هذا هو الخطأ هوما لي لازم نعاملوهم أفضل معاملة و نربوهم بلطف مليح تشربي مغنيزيوم و تستشيري طبيب نفسي لكن الأهم من هذا مجاهدة النفس و اذا كنت عاملة وممكن تحبسي لخدمة حبسي مؤقتا ولا ادي عطلة مرضية طويلة المدى راهم صغار وكلش يتعوض
Hala: اولا نقصيلها الحلويات درلها فرط حركة و تخففها ثانيا اهتمي بيها اكثر من أخيها الرضيع ان وجد ثالثا ك تبدا تبكي سمطيها ما تهديش معاها ديري كيت مان في وذنيك و اسمعي حاجة تحبيها رابعا ديري في بالك انها صغيرة و محتاحة رعاية و حنان و ماهيش عارفة بلي راهي تقلق فيك بلاك حاطة باباها يحبها و انت تكرهيها لذا لازمك ك تعود هادية تحطيها في سدرك و تحني عليها و تغنيلها و قوليلها انت أميرتي و جميلتي و صحبتي و ديري علاقة قوية معاها . و في اليل قبل ماترقد ديريلها المسح بالاخلاص و المعوذتين و قولي اللهم اني اعيذك بها من شر الشيطان الرجيم . رب يقدرك الامومه صعيبة و ثقيلة ولازمك تشربي نعناع مع بابونح قبل ما ترقدي و المنغنزيوم تاني يهدي . رب يصلح اولادنا و يجعلهم من اقوياء الدين و البدن و سعداء الدنيا و الآخرة رب يرزقنا برهم في حياتنا و دعاءهم بعد مماتنا . ورددي الدعاء اللهم احسن تأديب اولادي فاني لم أحسن تأديبهم .
Silla:لازم تتحكمي ف اعصابك اولا واذا فتي وضربتيها ماتروحيش بعدة تحضنيها وتبكي
طفل كائن ذكي للغاية يدرس حدود صبرك لابعد الحدود ويطبق عليك ضغوطات ...
بنتك ضرك راهي عرفتك نقاط الضعف تاعك
لازم تحبسي الضرب والعياط والعراك على كل حاجة
استعملي اسلوب التجاهل يعني ماتخليهاش تفسد على قدر المستطاع ولكان بدات تحرن ديري روحك ماشتيهاش وماتقلقيش حتو ولو توال الناس خليها كي تعرف بلي ماقلقتكش تحبس وحدها
وماتعقبيش وقتك كامل تنتاقدي فيها ولا مقيدتها لي فيها راهو مكفيها كاين امور تهدري فيها وامور ماتتساهلش انك تهدري وامور ديري روحك ماشتيش
حبيها حبيها واحتاضنيها واحتاويها دخليها معاك في روتينك واعطيها مهام تقدر عليهم فهميها بلي هي ذراعك وسندك
واخيرا الدعاء ربي يقدرك ويقويك
Fatima :ننصحك بكثرة الصلاة على النبي تهدأ أنا كنت مثلك وداومت الصلاة الإبراهيمية تبدلت وليت كالم مرانيش نتعصب على بناتي جربيها وتشوفي بإذن الله تريحي من هذا الضغط.
كاين طرفين في هذي المعادلة: الأم من جهة والطفل من جهة أخرى
ردحذفكلما نقصت الام من عصبيتها وتعاملت مع الطفل بشكل سليم كانت النتيجة طفلا أقل عنادا والعكس صحيح
اذا الأمر بيدك سيدتي الأم لازم تتحكمي في أعصابك تتعاملي الطفل هذا لحنانة واهتمام ولو انت التركي العصبية جانبا حتى يكون طفلك في المستقبل فردا صالحا في المجتمع