واش قالو النسا في الجزائر تعليقا على موضوع ضرب الأطفال
الضربة💪 و العضة😬 واللسعة 🐝و الحرقة 🔥مفعولهم يبقى في الصندوق الأسود لذاكرة الطفل , لا يمكن للعناق والتقبيل 👩👧👧محو مفعولهم .. مفعولهم اعمق مما نتخيل ..آراؤكم أمهات حول هذا الموضوع من فضلكم ....
Kholoud: هو يكدب عليك لي يقلك ما تستعملش مع الطقل اسلوب الترهيب ، و لكن الترغيب لازم يطغى و تخليه يكون ايجابي .
Mounira: عندي ولد اختي جربت معاه كل وسائل المعاملة ..ميحبش يفهم .ديفوا يجيني يفهم بالعكس..مثلا نقولو متخرجش يعاندني ويخرج..درك وليت نقولو اخرج دبر راسك ميخرجش..بصح يهبلني منقدرش نسيطر عليه كون منزيرش عليه زعما بضربة على اليد ولا نهددو ..معرفتش الحل معاه وش هو..علابلي طريقة غالطة ورايحة تأثر عليه ..بصح كون تشوفوه كيفماه هايج تعذروني ..انا بطبعي منحبش نقسي عليه صغير وميعرفش بصح يضطرني للحل هذاك الله غالب..ممكن طريقة باه نتعامل معاه.
Nabila: انا وحدة م ناس كل ما نلقا مرا تقيس ولدها كي نهبط لبلاد نبقا مشوكيا لاني ما تربيتش هكا خلاس و نحب نشكي بيهم و نطلعهم الحبس في اعماق قلبي ملقري عبالي امهم و عبالي مشها تضرب فيهم بلقاوي بصح التعديب النفسي و الهول على الطفل وسط الناس اونبليس عبالي بيان بلي حاجة قراف و صحاباتي يقولولي اي حاجة نرمال اكي نتي برك بصح انا عبالي بيان بلي هم وسي ضحايا العنف و افوغس يشوفو العنف كل يوم ناس ولالهم حاجة عادية و هي الحاجة ادي لي تخلي الطفل اداك يكبر يضرب اختو يعلي صوتو ع امو يحقر مرتو و الاسوء حتى كي يكبار يفسرو تصروفاتو بصفة عادية و يخترعو الاعدار و تولي الامراض النفسية متوارثة في هده الحالة امراض نفسية اجتماعية تنتقل عبر الاجيال و الاجيال نفسها لي تقاست بيها واحد ميرضى ع روحو في دقيقة لي يكون فيها الضحية لكن من حوله يعلمونه الصمت
الشعب بما انه غير واعي كثيرا العنف نقلو الى كل ما يحيط به تطلع في الحافلة يدزوك
في القسم من تكون صغير حتان الجامعة الاستاد يقول هداير لو قالهم في مجتمع اخر لدخل السجن
تدخل حانوت يدزوك
تروح للمسجد بيت الله يدزوك وسي و يحصروك و يزيد حتى الدين يحكيو فيه بطريقة عنيفة و يلصقو ايديولوجيات اجتماعية في كل حاجة عاطينها قيمة مثلا اختك شفتها لابسة لبسة معجبتكش تقتلها بالضرب باسم الدين
العنف في المدارس في المستشفيات في الطرق في وسائل النقل و الاسوء يلي بان ساهل للناس العنف في الكلام و الكلمات النابية حتى للدين و لله
ما هو مصدر المشكل: المصدر الوحيد هو الاسرة الغير واعية و التربية الغير سليمة ابدا ابدا و الغير صحية.
Om Nadjoua:الضرب يكون في مواقف ، و ليس ضرب يعني مصارعة و ليس ضرب في كل موقف يعني حتان يولي الولد معقد
بل تأديب بضرب خفيف يخلي الولد يحبس المشكل او ينتبه
اذا دار مصيبة قادر تخلي حياته في خطر باينة تضربو حتى لا يكررها باينة ما تخليهش
عندي اولاد الاقارب طايرين ، و جامي يترباو ، جربت معاهم الترغيب و كذا و كل الطرق حتى اني خبيت المشاكل لداروهم مثلا يكسرو حاجة و بالمقابل ما يعاودهاش ، لكن دون جدوى ، حتان خبرت والدين بلي مابغاوش و انضربو منها ماعاودوش
انا والديا ما ضربونيش الا اذا درت مصيبة كبيرة او حاجة تهدد حياتي.
Zineb: كاين ضرب من ضرب لكن انا نقولك ماشي الضرب الي فسد لولاد نتاع هاذ الوقت وإنما التربية غالطة الدلال هو الي يفسد لولاد شفت قداش من اولياء كيفاش يدللو في اولادهم ومن بعد حصلو معاهم.
Hafsa: انا شخصيا مارسو عليا جميع أنواع ضرب لقرصات شحطات لكفوف وكبرت ذرك راني مرأة ونسيت ونموووت على أمي وأبي ونشكر ربي صباح وعشية كي رباوني بهاذ طريقة ... أما مسألة لوقت ميش كيف كيف راني معاك فيها لكن ضرب في بعض الحالات لازم مش لعنيف حتى يسيل دم لكن نضربو على يدو كي يمس حاجة ولا يخرب عادي إذا سكتنا عليهم يفسدو قع حتى تأثر عليهم تخسرلهم لعقلية ومن بعد يولي واحد مايحبهم شفت نماذج ياسر ترباو بلا ضرب وعندك عندك برك مايتمسش قع وكي كبرو شوي عادو عالة على أهلهم فقدو سيطرة عليهم أبنك بش يتربى مليح لازم يكون يخاف منك مش بمعنى لخوف في كلش لكن فلأمور لي لازم يخاف فيها وإذا مكانش يخاف قع ولا من أي واحد معناها أنتظر لكارثة طفل عنيد عنيف عصبي باختصار مش متربي على طول الخط.
Ouarda: انا ثاني ضد التربية بالضرب لاني اصلا ماتربيتش عليها لكن بحكم زوجي مسكين تربا غير بالضرب هذاك واش يعرف اسلوب العقاب عندو غير الضرب و دايما ندوس انا وياه على هذا الاسلوب لكن كاين حاجة حبيت نقولها انو في الوقت الحالي المشكلة ماشي في الضرب بالعكس الضرب يبانلي راه مليح مع الاهمال الاطفال في هذا الوقت عادو يعانو من الاهمال الام في واد و الاب في عالم اخر و الولاد لا اهتمام لا والو يبانلي اسلوب الاهمال امر من الضرب.
Fatma: عندي مرت خويا ولدها كي كان صغير مايعرفش كانت تضربو تقرصو و تغلقلو فمو باه ما نسمعوهش مع اني داوست معها شحال من مرة لكن 🤷و دوك راه يقرا سنة ثالثة ابتدائي ما يخالطش العيباد و نهدروا معاه يبكي بلا سبة هي في بالها رباتو بصح الحقيقة والله ضيعاتو 💔.
Jamila: معندهاش علاقة بالوقت احساس بضعف وكره وضعف شخصية نفس الشيء جيل الماضي تجده عنيف وقاسي القلب لأنه تربى على القسوة
لو علمنا أبناءنا الاحترام ت عقاب وجزاء لا نصل الى الضرب حتى وإن كان الضرب الرسول صلى الله عليه وسلم قال علموهم في 7 وضربوهم في 10 ولكن لم يقصد الذي يولد العاهة أو حالة نفسية لطفل .
Soumia: أعظم هدية تقدمها لطفلك
أن لا يذهب لطبيب النفسي عندما يكبر 😉.
Om Rama: رجلا كنت او مراة
تضرب كائن ضعيف عليك ... أنت ليست لديك شخصية و ليست عندك ذرة إنسانية
لازم الطفل يكون صديقك و ليس ابنك فقط ، تعاقبه و تكبرله عقله و توريله الطريق الصحيح
أنا أتكلم عن تجربة .... العنف يجعلك إنسان غير طبيعي و كلما تكبر تسوء حالتك النفسية.
Fatima: أنا وحدة من الناس تعرضت لكثير من الضرب في صغري وكان بابا عندو العقلية تا يخلي عماتنا ولا خوالنا يضربونا زعما في مصلحتنا وحتى الجيران ساعات تضربت ياسر ومرات ضرب مبرح تا يبقى الأثر على جسمي بصح ولا مرة تعلمت بالضرب يعني على قد ما كانو يضربوني ندير لي في راسي ولاكان تعلمت حوايج في صفري تعلمتهم من التجارب كي بديت نكبر مش من الضرب حبيت نقول بلي ماهوش خلاص وسيلة تربية وأنا كي يجيو ولادي إن شاء الله.
Om karam: مثال مني عندي بنتي عنيدة شوية ضربتها مرة قلقتني ولات في عندها اكثر وما تسمعش الكلام جربت معاها نلومها بطريقة هادئة لقيتها تسمعلي وتقولي حاضر وما تنساش الضربة الضرب ما يربيش أحيانا.
Ghalia: انا خطرة كنت زعفانة ووليد خويا عندو عامين .. بقا يسمط قدامي ونعطيه ب طريحة بردت فيه قلبي و زعافي حتا ولا يتنهد وكي يشوفني يتخلع مسكين 😭😭😭😭😭😭 والله غير نحبو وللدوك كي نتفكر نكره روحي و نشمئز من روحي اوووف 😭😭😭.
Sabrina: لي قول راني عادي تربينا هاكا هو بذاتوا معمر عقد النفسية يخبيهم و يرميهم على ولادو بلا ما يفيق و تبقى الحالة تمشي
افضل البلدان من ناعية نوعية الحياة واحترام : كوريا جنوبية و اليابان و النمسة و سويسرا و المانيا و نيزويلندا روحوا شوفوا لتم اذا والد (ة) يضربو و يعنف وليدوهم.. الاقلية لي تديرها يرموه في فالحبس. 🤦♀️.
Mamat Anas: لي يقولك حنا تربينا هكا و الضرب نورمال أعرف بأنهم مش نورمال و هادي وحدة من آثار طريقة التربية :).
Basma:جامي تضربت بصح قالولي هداير مزالو محفورين في مخي ،كون يحكمني الزهايمر ما ننساهمش تالمون قاسوني
العنف الجسدي الأثر تيعو يروح و الطفل ينساه بصح اللفظي يبقى معاه للممات ، نصيحة للوالدين اعرفو وش تهدرو مع ولادكم.
Rima: لي يقولوا حنا تربينا
متعرضوش للضرب الحقيقي(التعذيب)
ساعات ندعي نقول ياربي اذا حا نعامل ولادي كما عاملني الوالد منجيبش دراري ولا منتزوجش احسن.
Nona: ربي خلقنا بشر وجعل بيناتنا مساواة وعدل ماشي من حق اَي واحد يضرب غيره خاصة الناس الضعاف كيما الأطفال من غير المنطق انه الواحد يستقوى عليهم لأنهم ما يعرفوش يدافعو على أنفسهم .
Narimane: أكيد ، بكري كي ندو ضرب نبكو و نرقدو ضك الطفل ولا كي ينضرب تبقالو في الذاكرة تاعو يلايمهم و يبدا يخمم في الهروب من المنزل خاتش التلفيزيو و اليوتوب كي يشوف فيهم الأطفال لخرين كيفاه عايشين يعتقد عايشين ديما فرحانين و هذيك هي حياتهم مالا يشوف دارهم شغل مجرمين كي يهرب منهم يعيش مهني لا قدر الله ، كونو رفقاء مع أولادكم.
Assala: لي يقولو نحنا و نحنا تربينا بالضرب !!
تضربتوا ضرب مبرح !!
اذا صح ضرب بعنف......
شوف مع شخصيتك كفاه راهي درك!! تحب والديك خوك او اختك لي ارتكبوا فيك ابشع جريمة ؟ !!
معندك حتى مرض نفسي 🤔
الضرب ابشع تصرف .... للكبير و الا للصغيير ....
ادا راح نعاملوا اولادنا بهاد المعاملة منجيبوهمش احسن . .
Fadila: الضرب للزم ساعات بصح ما يكونش مبرح، اي واحد يقوللي الضرب يبقى ضرب ما نتفقش معاه.
Rahma: وي صح لحد الأن منسيتش الضرب و كلمات لي توجع مقدرتش نحيها من راسي ننسا كلش و مننساش هدرة دارنا لي توجع 💔
ان شاء الله نكبر و نجيب دراري جامي يحسو واش حسيت في غيابي واحد ميعوض بلاصتي عندهم 👌.
Biba: ماهمش نورمال مستحيل واحد كبر بالضرب القوي و الكي بالنار و التعذيب يخرج نورمال لكان جات النار ساهلة او مادارهاش ربي في جهنم.... نحير فلي يقولو خرجنا لاباس بينا و هوما اساسا مسوخ بشرية 😡😡.
Samiha: في عمري 22😢😢😢😢😢مزلت نتفكر كل ضربة واحباط تعاسة احتراق حزن الم غيظ قلق .............................................................................................................................
لا يوجد تعليقات
أضف تعليق