السلام عليكم
من فضلكم أخواتي أريد نصيحة من القلب لعلي أتعظ .. أنا كنت مواظبة على الصلاة وقراءة القرآن لكن منذ تزوجت انقلبت حياتي صرت أصلي مرة وأتكاسل عن عشرات الصلوات وهذا الأمر أنهكني وأتعبني وخوفي أن أموت والله غير راض عني وقد أهملت صلاتي وحتى زوجي حدث له نفس ما حدث لي من فضلكم ساعدوني على إيجاد حلول بارك الله فيكم
Saada:يا اختي لن نستقيم إلا إذا عظمنا هذذه الصلاة و عظمنا قدر الله عز و جل و واجبنا نحو ما أمرنا و عظمنا يوم لي نموتو فيه يجي نهار نموتو و تخرج منا الروح و ما يقعد غير الندامة حتى انا ني نعاني من صلاة الفجر باقي الصلاوات حمد لله و ني نجاهد و نقول لازم نوض و هي و الحرب بيني و بين النوم سجال مرة نوض مر لالا بصح دايما نحارب جامي نفشل
Samia :اختي احيانا الذنوب تحرم الانسان من لذة الطاعة اكثري من الاستغفار وقراءة القران وادعي دعاء. ربي اجعلني مقيم الصلاة ومن ذريتي ربنا وتقبل الدعاء.
Karama :راهي حاجة عظيمة وأول اركان الاسلام ماتقعديش تساعفي فروحك
Mariem :نحكيلك عن شيء مجرب جربتو بنفسي
و هو انك تعطي الصلاة قدرها هذا هو الحل
مثلا انا كيما قلتلكم نعاني مع صلاة الفجر
لاحظت نهار قبل ما نرقد مبقى نقول انا غدوة نوض نصلي فجر .. غدا و لو أزحف سأصلي .. غدا و لو نمت دقيقة سأستيقظ و أصلي ... غدا سأهزم نفسي نوض سيك نوض مكاش خيار اخر صدقوني نوض و كلش لمااذا ؟؟ لانو لازم نخلص النية لو 99% ناوية توضي و 1% ناوية متنوضيش .. صدقيني متنزضيش...ديريي هذي الطريقة مع كامل الصلاوات
ديري منبه اذا معندكش صلاتك راهي دير الأذان
اتوضاي قبل الاذان بخمس دقائق و ديري منبه 5 دقائق خاص للوضوء
بعد الأذان كري و رددي مع المؤذن كما علمنا رسول الله و اقرأي دعاء بعد الأذان
مباشرة روحي تصلي متبقايش تخمي فالطنجرة تتحرق او اواو مباشرة روحي
حاربي الضروف يا لوكان راكي برة اثبتي متضيعيش صلاتك
و ربي يثبتنا و ينفعنا بما علمنا
Lina :احذروا سوف فإنها جند من جنود ابليس
احذروا (سوف).. كانت هذه وصية رجل عاقل من رجالات عبد القيس عندما قالوا له أوصنا.. قال: احذروا سوف. وهي نفس وصية ثمامة بن بجاد السلمي قومه، حين قال لهم: أي قوم، "أنذرتكم سوف"!! سوف أعمل، سوف أصلي، سوف أصوم. وهي من أعظم الوصايا التي يوصى بها إنسان، ترك التسويف والمماطلة وتأجيل الأمور وتأخيرها عن وقتها
اللهم لا تدعنا في غمرة ولا تأخذنا على غرة ولا تجعلنا من الغافلين.
Kamar :احظري الجمعة مع بناتك و أحظري حلقات للذكر و وقت فراغك توجهي للمسجد و ربي يهديك و يهدينا جميعا
Khadija : ننصحك تخصصي فغرفتك ركن للصلاة وديري فيه السجادة والمرفع يكون فيه كتاب القرآن وحصن المسلم واشري طقم صلاة يكون مريح وباللون لي تبغي صدقيني الأمر هدا رح يساعدك بزاف بإذن الله وربي يوفقك ويتبتك بإذن الله
Nour :الدعاء الأخت واضبي على الدعاء خاصة في اوقات الاجابة مثل الثلث الاخير من الليل واخر ساعة من الجمعة وبإذن الله تشدي في صلاتك
Batoul :شفتو علاه نصيحة رسول الله مين قال من ترضون دينه وخلقه كون راكم ضرك تنسابقو فالصلاة كنتي في بيئة تساعد على الإستقامة في بيتكم و مين تزوجتي رحتي لبيئة الدين أخر إهتمامتها لذا حدث هذا يجب ضبط الأمور قبل أن تنفلت أكثر البيت الذي لا تقام فيه الصلاة قليل البركة إن لم تكن منعدمة لازم تصنعي بيئة لأولادك كيما البيئة لي صنعوها والديك ليكم باه وليتو تصلو و الله يهدينا
Lamis :ديري تطبيق صلاتك فالتلفون ديما يفكرك ، و ثاني حاجة تفكري هذا الحديث
بريدة قال: قال رسول الله صلى الله عليه وسلم: «إن العهد الذي بيننا وبينهم الصلاة، فمن تركها فقد كفر».
[صحيح] - [رواه الترمذي والنسائي وابن ماجه وأحمد]
Basma :ختي حاولي تكوني قاسيه مع روحك ديري تحدي 90 تصلي مهما كانت ظروف صلي تفوت تسعين يوم لشتات ما معندكش نفحه تلقاي روحك داخل لازم نصلي بيسك صاي تعودتي عليها ولات جزء لايتجزء من حياتك وتاني صلاتك لي مصليتهاش قبل لميها وعاودي صليها بيسك تتحاسب عليها وتاني حاولي فدار يعني يكون زوج صلو جماعه خاصه الايام لي ميخدمش فيهم يقعد فدار توضاو نتي والأولاد وصلو جماعه جميع صلوات بلعكس حتى ذراري يولو يتحمسو يصليو ولازم توقفي عڨابهم بأه يصليو انا ماما خويا كرهتلو حياتو عامين روح تصلي روح تصلي حتى حفظ صاي تخزر فيه يعني نوض تصلي ههه ولا مايقدرش يرقدش بلما يصلي واش حابه نقولك تاني ديري في بالك بلي اي انسان او يجاهد نفسو على حاجه ولا على معصيه مايدير هاش يعني كامل رانا نجاهدو بأه نكونو صالحين وتاني ديما ادعي دعاء سيدنا إبراهيم ( ربي اجعلني مقيم صلاه ومن ذريتي ربنا وتقبل دعاء ربنا تقبل منا إنك أنت السميع العليم) اقرايه ديما كل ماتتفكر اقرايه وربي يثبتك احبيبتي 🤲❤️
Sabrina :راقبي طاعتك لزوجك
أو كماقال رسول الله صلى الله عليه وسلم "ولن تجد المرأة حلاوة الإيمان حتى تحسن لزوجها"
Hanine :الله يرزقك الهداية ونحن وجميع المسلمات والمسلمين يارب العالمين والصلاة والسلام على سيدنا محمد وعلى آله وصحبه أجمعين
Farah :ربي يثبتك ان شاء الله شوفي شيخ ابن عثيمين و تبعي دروس ديالو ف اليوتوب و اقراي ولا اسمعي كتاب الداء و الدواء بشرح الشيخ ابن عثيمين راح تستفادي بزااف
Fatima :المؤمن يضعف و يقوى الإيمان نتاعوا ، يحاول جهد الإمكان يواظب على الطاعات، أنصحك بكتاب فاتتني صلاة ففيه يتناول الكاتب كيف يواظب الكثيرين على صلاتهم رغم الظروف و يشرح أهمية الصلاة و لمن نصلي ، فحين نعرف المعنى الحقيقي للصلاة يوفقنا الله للمحافظة عليها، هدانا الله أجمعين
Mima :الشئ الوحيد لي يخليك ماتسمحيش في صلاتك هو انك بمجرد سماعك للاذان هرولي الى الصلاة ماتأخريهاش احكي عن تجربة ،ياما تهاون وتكاسلت لكن شوية ارادة رجعت بقوة ربي يثبتنا ويهدينا سواء السبيل
Bouchra :بالنسبة للزوج مكانش افضل من المواضبة على صلاة الجماعة افضل طريقة تخليه يواضب على صلاتو انو يحاول يصلي اوقاتو في المسجد
نسال الله الهداية و الثبات
Nassima :غير مجرد انك ترجعي تصلي رح تحسي بفرق كبير مكانش حاجة تخليك تشدي في صلاتك قد نفسك لازم تغلبيها يأذن تروحي تصلي ما تفوتي حتى صلاة هك رح ترجعي مواظبة عليها و متقدريش تفرطي فيها
Hiba :الا الصلاة ما تفرطيش فيها راها عماد الدين مهما اذنبتي ، قبل موعد الاذان نوضي توضاي ولبسي حجابك غي ياذن تلقاي روحك واجدة ديراكت تصلي
اذا كان عندك حاجة ديريها ولا خدمة ولا خليها ونوضي تصلي
Imane :اتفكري بلي الصلاة هي الخيط الي يربطنا بربي و انو بلا صلاة انت متعبريش مسلمة ربي يهدينا اجمعين
Nadjet :تاركها كافر هاذي وحدها تكفي
راهي مجرد 10 دقايق من وقتك وزيد راكي امرأة قاعدة فدار ميشغلك والو وما واجباش عليك الجماعة يعني تعجزيلها وباقي الشغالات لا ؟
قال رسول الله صلى الله عليه وسلم :"العهد الذي بيننا وبينهم الصلاة من تركها قد كفر "
واعلمي انه اذا كان احد الزوجين لا يصلي يجب مفارقته والطلاق منه حتى يتوب فما بالك بالزوجين في زوج
Fadila :والله يا اختي راح ننصحك و نوجهك لامر ممكن الكثير يغفل عليه و هو الامراض الروحية: العين و الحسد و السحر.. هاذ الامراض لما تصيب الانسان تخليه بعيد عن الله . تخلي العبادات تجيك ثقيلة بزااف خاصة الصلاة
اذا يجيك تثائب عند الصلاة او قراءة القرآن. .. هنا نقلك ارقي نفسك بنفسك حاولي تقراي سورة البقرة كل يوم
مليحة بزااف
مع شرب الماء المرقي فقط. ارقيه انتي
و اغتسلي بالماء المرقي ايضا
و شوفي مع نفسك . مع مجاهدة النفس طبعا و الله اعلم
منيش نوسوس فيك . بصح حبيت نولهك لهاذ الجيهة .
Racha :لازم تحاولي تذكري زوجك وتتعظو سيرتو كي عندكم ولاد ، أنتوما القدوة تعهم .. عالأقل تخليو بذرة صالحة تدعيلكم بعد موتكم .. تصرالنا كامل إنما حاولي ترجعي وادعي ربي يوفقك لعبادته وان شاء الله ربي يثبتك
Yousra :كاين بزاف حوايج يثقلو عليك الصلاة ، المعاصي ، المال و الأبناء فتنة ، عليك أن تراجعي نفسك ، لو لم تخصصي لنفسك ورد يومي للقرآن مع التدبر و الأذكار و الصلاة في وقتها سوف تضيعي في هذه الدنيا
Lila :نصيحة ختي ارقي روحك و دارك ديري حجامة ديري اذكار فالدار اقراي سورة البقرة و تشوفي كيفاش تتبدل حياتك
العين و الحسد حق
Souhila :شوفي كاين كتاب مليح اسمه فاتتني صلاة قرايه راح يساعدك وكاين كتاب ثاني حكم تارك الصلاة ابن تيمية طلعيهم pdf راح يساعدوك بإذن الله وصلي كل وقت في وقته راح تولي تحسي بتأنيب الضمير كون ماتصليش ورقي نفسك بنفسك وديما خمي بلي تارك الصلاة في حكم الكافر مع أنه لبعض يعتبروه عاصي ولكن عندك الوقت وراجلك يخليك روحي حضري دوروس دينية مع مجموعة نساء فالمسجد راح يساعد لأنه الصحبة الصالحة تعاونك بربي ان شاء الله وربي يثبتك ويثبتنا ويهديك ويهدينا يارب
Wahiba :اتوضي قبل اذان باش غير ياذن تصلي أنا شخصيا هذي طريقة فدتني.وليت منعجزش نهائيا.بلعكس نتحمس لوقت صلاة
و ربي يهدينا و يثبتنا
Asma :زوج ركعات فالليل وادع من قلبك هدا الدعاء ( اللهم ثبت الصلاة في قلبي )
اللهم اجعلني مقيم الصلاة ومن ذريتي"
ردحذفربي اجعلني مقيم الصلاة ومن ذريتي
ردحذف