نصائح فعالة وحلول سريعة للتخلص من الكلام البذيء عند الاطفال 2024

واش قالو النسا في الجزائر على طريقة تأديب الطفل للتخلص من الكلام البذيء والألفاظ السيئة 

سلام عليكم 

كفاش تتعاملو مع طفل صغير حفظ كلام عيب  و راه يعاودو فالدار ؟

Lamia :ما تعطيهش اهتمام كبير وين يحس روحو يدير حاجة تلفت النظر ، ما تضحك ما تعيط عليه ... وحدو راح ينسى

Mariem :التجاهل وماتنتبهلوش ولا تضحكلو ، سينون يزيد .. اي تصرف ولا كلام مش مليح اتصرف هك وحدو ينساه اما الا شاف الزهو والقصرة يحسبو تشجيع ويولي يديرلكم كلون .. 

ايضا بعدوه على مصدر الكلام هاذا 

ان لم تنفع وبقا .. عليك وعلى اساليب الجدات

Batoul :حاولي كي يقولها متركزيش معاه 

قولي له مرة واحدة برك بلي متزيدش تقولها ومنبعد لا تركزي

اذا ركزتي ثم يزيد

واياكي تضربيه راح يزيد

Lodjain :جرب تفهمو مع الاول بلي ربي مايحبش لي يقول هكا و عقابو كبير و كلش.

اذا مانفعش معاه دورها هريسه حتى يتربى+ بعدوه على الناس لي رفد منهم طبايع هذي

Karama :نعلموه اثر الكلام الطيب و و نهدرو معاه بالكلمات الجميله و ان الله ميبغيش لي يقول كلام فاحش وكي يقولهم اما يزعفو منه ويتجاهلوه او اذا استمر يتعاقب 

نحكولو قصص الصحابه و كيفاش كانو يعاملو بعض و مع لوقت ينساهم لكن شوفي اولا وين تعلمهم

Lina :لي يقولك الضرب راهو غالط مايعرفش الاولاد تع هاذ الجيل..انا عندي اولاد اخوتي مين ذاك يهزو كلمة كنت نضربهم واالو...دوك كبرو وعرفو صلاحهم شوية دوك زادو خاوتهم الصغار كيفكيف لكن غيرت من طريقتي معهم..كي يقولو كاش كلمة نقولهم مرة وحدة فالبلاصة بلي ماتزيدش تعاودها ماشي مليحة بنوع من عدم الاهتمام وحتى واذا عاودها ندير بروحي ماسمعتهاش..هكذا لقيت نتيجة اقضل من الضرب..لانو كل ماتضربو وتبقى عاسو وكتاش يقولها قد مايشفى عليها ويزيد يعاودها..

Hanine : الضرب راح غير يخليه يخشن راسه 

كيف تعالج فعل سيئ بحاجة اسوء الي هي العنف 

احرمه من الأشياء الي يحب يفعله اذا كرر فعله.

الطفل فقط يقلد و المفردات هذي لا يعلم معناه ، اسوء حاجة انك تضربيه على او تتعاملي مع موقف كيما هكذا بشكل سيئ حاولي تفهميه بلي هذا خطأ و عيب  عادي هذي فرصة انك تعلميه .

زيد ردة فعلك راه يلحظها الطفل و راح يستغلك في هذا النقطة و يصبح يغضبك و يقلقك بتكرار قول هذا الكلام.

Nour :عقوبة على حساب سنو منوعولو الالعاب ولا الخرجة لبرا نحولو حاجة يحبها و خبروه السبب هو ديك الكلمة ، و عزلوه على المحيط لي تعلمها منو

Khadija :لازم تفهموه بلي عيب وحرام وبعدوه على المحيط لتعلموا منو هذا الكلام  ويمكن ايجاد  بدائل للكلام الفاحش  و اعطائه مكافآة  كدعم للتخلص من الكلام البذيئ اذا   لم يستجب فيجب حرمانه من الأشياء التي يحبها كالنزهة أو الهاتف والالعاب أو اللجوء إلى الضرب

Fatima :اول حاجة اقطعو علاقتو بالانسان لي علمو الكلام الفاحش، ثانيا كي تسمعوه يقول في داك الكلام ماتقعدو مخلوعين كيشغل طاحت السما باسكو الطفل ادا شاف روحو شد انتباهكم بكاش حاجة راح يبقى يعاود فيها وادا كان صغير العقاب ماهوش رايح ينفع معاه (الحار والضرب وو خاصة انكم انتوما الكبار لي طلقتوه وما امنتلوش الوسط المناسب باه يلعب فيه لي تستهلو العقاب)، وثالثا كي تكونو قاعدين شدوه عندكم وقولولو أثر الكلمة السيئة على الناس وادا هو يحب كي تسبوه ودينيا بلي ربي يعاقبو ويديلو من حسناتو، ورابعا اعطوه البديل، مثلا قولولو ادا بغيت ربي يعطيك حسنات كي واحد يقلقلك ولا يغلط فيه قلو (غفر الله لك، هداك الله، حسبي الله)

Nassima :اولا العنف خطيك منه

ثانيا بدا قبل بأصل المشكل شكون لي سمعه حتى تعلم منه اذا كان من اهل البيت قلعله لابغا كبير واذا كان من الخارج تمنع عليه الخروج وتفهمه واش هو السبب قوله تسڤم هدرتك تخرج

ثالثا فهمه بالشوي بلي كلام عيب وحتى اذا تحتمت اشرحله وحدة من هذ الكلام بينك بينه خليه يعيف الهدرة هذي

واخيرا استعمل اسلوب المجازاة يعني خوه ولا اخته ماتطيحش ولي تعطيها هدية صغيرة بصح ماشي تقوله لاخاطر ما طيحتش لالا قولهم لاخاطر هدرتها حلوة وشابة ومافيهاش كلام عيب هكذا وحده يولي يتحاشى الكلام البذيئ

Salima :بكري ماما كنا كي نقباحو ولا نقولو كلمات تاع شارع تحمي مغرف وتجي لينا تقولنا خرجو لسانكم (يعني تمثل انها رايحة تحرقنا فللسان حتى نولو نطلبو فسماح ومنزيدوش نقولو)

Kamar :اقتناعك انه طفل صغير يعاود وش راه يسمع ككل الكلام وهو لا يفهم ما يقول كيما انه راه يشوف فيها وسيله للتعبير رفدها على شخص اخر يقدر حتى يكون من العائلة 

التجاهل  لانه اكيد راه حاب يلفت الانظار  وبالتالي كي يقولها ماتعيريهش اهتمام وخاصة عدم اللجوء للعنف  

الكلام معه بهدوء انه هدا لكلام عيب يتقال وانه لي يقولو مايحبوش ربي سبحانه

حاولي تعلميه في اسلوب اخر يعبر بيه عن غضبه واستياؤه 

مع الوقت رح ينسى الكلمات البذيئة خاصة كان راه في عمر صغير يعني راه يلقن ومايقدرش يميز 

التربية لازمها صبر  راه كمن ينحت في الصخر

Wahiba :الضرب والعقوبات ماشي حل

الطفل هو يحس أنه تعلم حاجة لازم يطبقها ويجربها هذا هو الفضول تاع الأطفال

هو ضرك تعلم طياح لازم يتعلم ثاني علاه مالازمش يطيح، علاه هاذوك الكلامات عيب، لازم يتعلم بلي ربي يزعف عليه وربي مايحبش العبد لي يطيح ويقلل إحترام الناس الآخرين...

Souhila :انا ضد العنف أو اجبار الطفل انه يدير عفسة (او يمتنع عنها)  بسبب الخوف من شيء ما .. راح يبقى ديما راغب انه يدير هداك الفعل و يولي يدير في غياب الوالدين 

لازم الطفل الصغير يتربى على مبادئ لي راح يبقاولو طول حياتو و يقتنع بمدى صحة الأفعال لي لازم يديرها أو خطورة الأفعال لي لازم يتجنبها

اذا علابالك شكون علمو لهذي الكلمات خاصميه و عاتبيه قدام طفلك و وصلي الفكرة للطفل أنه الشخص هذاك غير محترم

في النهاية الطفل عندما يكون غير واعي لما يفعل أو لما يقول فهو لا يستحق العقاب لأنه لم يخطىء عن قصد

Linda :قبل مانبحثوا عن الطريقة لازم نعرفوا الفاعل أو السبب.. وإذا عرف السبب بطل العجب يعني طفل صغير مستحيل ينطق كلام السوء من راسه لازم يكون سبب إما فالعايلة عندكم من يقول عبارات بذيئة والطفل لأنو طبعوا بلخف يرفد في راسه أكيد رح يسمع ويشوفها حاجة عادية ويبدا مام هو يقول هنا في هاد الحالة لازم نبدو بالشخص لي راه يقول الكلام البذيئ هذا يتوقف فورا على الأمر هذا بعدها نروحو للطفل نفهموه انو هاد الشي ماشي مليح وطبعا الطفل رح يفهم ويتوقف اما اذا البيئة قعدت نفسها الطفل رح يحس بتناقض وحتى اذا ضربتوه غادي نفس الشي دايما يعاود الكلام البذيئ وميوليش يهتم للضرب ثانيا إذا كان السبب الشارع يعني تخلوه برا لساعات طويلة والشارع مكتظ فيه المليح والقبيح ممكن راه يسمع من برا وممكن مالأطفال لي راه يلعب معاهم هنا لازم تمنعوه مالخروج وحدو ويتولى الأب تاعه ولاأحد أفراد العائلة لي معاه يخرجوه مرة على مرة معاهم باش ميكرهش وميتأزمش تذكرت أمر رانا في فصل الصيف وكاين المساجد تقدرو دخلوه للمسجد يقرا القرآن يقضي ساعتين او تلاتة فالمسجد احسن من الشارع .. حاولو تدو اطفالكم يرفهو شوية على نفوسهم مشي شرط تديه للبحر ولا پيسين يعني حديقة ولامناج ان توفر والله المستعان فقط

Nadjet :بابا كان يشدلنا ويقولنا ارفدو بيدون ما هداك تاع سعيدة 5ل وارفدوه لسما ودورو للحيط نضربو كاش ساعتين ولاتلاتة وفهداك الوقت لي رافدو ديريلو درس فالاخلاق والتربية واحلفي فيه يعاودها ديريلو ماكتر  انا كانت أسوء مخاوفي هدا العقاب وادا حبيتي تصعبي العقاب قوليلو يوقف على رجل

Wafa:اختي هذا يسموه التربية الصوتية الي تقريبا جميع الاباء ناسينها و مهيش مدخلينها في تربية اطفالهم اول حاجة لازم تعرفي منين سمع الكلام هذا و من بعد تبداي تعدليلو السلوك نتاعو بالشوية راح يتجاوب معاك و اخطيك ملي راهم يقولولك الضرب و فلفل حار و ماشابه لانو صح راح يجيب نتيجة معاك اما مع غير و لا كي متكونيش انت راح يقولهم و خصوصا عند الاطفال كل حاجة ممنوعة مرغوبة

Samira :ما تتفاعلوش معاه ني بالضحك ني بأي حركة و لا يعني كي شغل ماقال والوا 

هو وحدو بعد مدة ينساها 

و الا كي يهدرها حضنوا و احكموا عندك و احكي معاه بلعقل ا حبيبي مالازمش تقول هك كون تقول هك نديلك مثلا اللعبة تاعك 

و كي تشوفوا مهدرش كافئييه 

اصلا هو مايعرفش اذا صحيحة او لا هو كي يشوفكم تفاعلتيو معاه يعجبوا الحال و فقط