واش قالو النسا في الجزائر على الطريقة الصحيحة لمتابعة وتوعيةالابن المراهق
سلام..
أنا أم.. كيف ازرع حب الله وتقواه في ابني المراهق..
ابني عمره 13 سنة ربيتو على الدين وحب الصلاة والقرآن لكن اكتشفت ان له ذنوب الخلوات ولقيتو تفرج مع صحابو بعض المقاطع في الهاتف
انصحنني يا أمهات ماهو التصرف الصحيح مع ابني
Fadila :ما يكبر راس حتى يشيب راس، واش رآه بستنى فينا ، شوفي الاخت، الي نقدر نقولهولك جربي الأمور التالية و أن شاء الله تجيب نتيجة :
1- بعد كل صلاة، قولي اللهم اني استودعتك ابني، و أودعتك قلبه و سمعه و بصره و فرجه و كل جوارحه
2- تحكيلو على ذنوب الخلوات، و انو الواحد مايقدرش يدير ذنوب في مكان لا يوجد فيه الله
3- احكيلو أو ابحثي عن افلام تبين سوء المجالس التي يحضرها الشيطان و لا يكون فيها ذكر لله ...
قصدي كل هاد الأفكار تقدري توصليهالو بالحديث معه أو عن طريق مشاهدة افلام أو قصص بصفة مشتركة و تشرحيلو و توصليلو الفكرة
4- احكيلو عن خيانة الأمانة و الثقة بطريقة ذكية
5- فهميه انو الصديق الحقيقي يمسك بيدك للخير مش للشر ، قوليلو اياك ثم اياك ثم اياك تعلم حاجة عيانة لاي مخلوق كان، لأن كل ما تعلمه يقعد جاري على رقبتك
حتى بعد موتك، أن كان خيرا فهو خير له و إن كان شرا. فهو شر له ...
و الدليل هو حديث الرسول صلى الله عليه وسلم عن كل عمل ابن آدم الذي ينقطع بعد موته الا من ثلاث .... و اشرحيهولو
يعني لو مثلا يوري سيت عيان لكأش واحد، و هداك الواحد يزيد يوريه و هي رايحة، كامل الي تعلمو هاداك السيت العيان يكونو محسوبين على رقبتو... فهميه بهاد الطريقة
6- فهميه أنو الصديق العيان رح يزينلو شر افعالو لانو إذا عمت خفت، و لو يتبع كلمة (أكثرهم) في القرآن يلقاها (ضالين ظالمين لا يفقهون ....الخ)
7- فهميه انو سن المراهقة هو سن وهمي اخترعه أصحاب المصالح للإمداد من عمر نفوذهم
و لو لم يكن غير ذلك، لما أعطى الرسول صلى الله عليه و سلم قيادة جيش بأكمله فيه كبار الصحابة لشاب بعمر 17 سنة ، يعني اكبر من ابنك ب 4 سنين فقط
و لما فتح السلطان محمد الفاتح القسطنطينية بعمر ال 21
و غيرها من الأمثلة التي تثبت أن سن المراهقة عبارة عن كذبة عالمية صدقها الجميع
8- نسيت واش كنت رح نزيد نقول، جربي هادو و أن شاء تلقاي نتيجة
Hanine :شوفي أختي انصحيه بطريقة غير مباشرة يعني خليه يجلس حذاك وديري فيديو داعية مليح يهدر على فيديوهات وصور المخلة وزيدي صوت وخليه يسمع وانت استغفري ربي قدامو وقولي يآرب أبعد عن ولدي وأولاد المومنين يآرب لطفك ضخمي شوي وههه واخشعي وأبكي ههه استعملي الحيل هذا الجيل صعيب ربي يحفظهم
Nour :اختي هذي العمر كامل يجوزو علي هذا الامور لازمك تهدري معاه بلعقل وتحاولي تفهميه انو حرام لانو في هذا العمر يبداو يميلو للامور الجنسية وكل طفل ودرجة الميلان الاهل ماشي كي مثقفين معناه اولادهم راح يخرجو خط مستقيم الطفل قبل ميلحق لسن لي يولي العقل تاعو متوازن ويتغلب علي شهواتو الخط المستقيم لي رسمتيهولي يبدا يعمل انحناءت احيانا تكون بسيطة واحيانا تكوني انحناء كبير ولازم الصرامة بصح بنسب لوليدك يحتاج انك تتكلمي معاه فقط
Hafidha :معني قدامو قولي عيطتلي صحبتي وقاتلي وليدها يشوف حوايج مش ملاح فليوتيوب قوليلو حمدلله لي ربيتك أحسن تربية مش كيما وليدها يدير فذنوب ليه وليماه وتروح البركة مدار والنجاح يجي ناقص خاطر فيه الحرام المهم بطريقة عير مباشرة حتى ويفهم بلي عرفتي مش مشكل راح تكبري فعينو لأنو معاقبتيهش
Kamar :ديري فيديو مواعظ على هاذ شي و زيديلو و قعدي قدامو بش يسمع امبعد تبداي تنصحي فيه بلعقل
Yasmina :هذا لاج كامل معرضين فيه لهذا شي الدور تاعك انت لازم تديري حماية ف تلفون تدخلي في چوچل و تديري safe serch باه كي يجي يبحث عليهم ما تطلع له حتى نتيجة ثانيا وعي امهات تاع صحابه باش هما تاني يوقفو مع اولادهم ثالثا جمعي مع ولدك و حافظي على هدوءك و تكلمي معاه براحة قوليله شفت واش درتو قوليله انا اليوم شفتك و مرة خلاف ما نشوفكش لكن ربي لي راه الفوق يشوفك في كل مكان و كل مرة و كل وقت ما تخافش من عقاب تاعه ؟ ما تخافش هذه الحاجة تكون سبب في منعك من الجنة !؟؟
Wahiba :احكيلو بطريقة مبسطة وغير مباشرة عن ذنوب الخلوات وكيفاه ينفظو جبل من الحسنات في ثانية وهي من اعظم الذنوب .....
Mariem :الناس كامل هدروا على الام اين دور الأب انت ضرك لازم تدخلي الأب لانوا فهذا العمر مراقبت الأم وحدها ماتكفيش لازم الأب يطحت فالصورة وهوا لينصحوا وحدهم ويجي ويقلك واش دار بينوا وبين ولدوا لحوايج هذي متحكيهاش الأم باه يبقا الولد يثق فيك ومايطيحش لقدر الأب عادي والله عن تجربة مع ولادي لوكان بنت انت تهدري وتحلي الموضوع والله غير تبعيني بصح الأب يكون ذكي مش يروح يض، يضرب لا أخر حل الضرب
Karama :تبانلي الام لي متتوقعش انو ابنها رايح يدخل يتفرج هاد الشي ولو مرة واحدة راهي عندها نقص معين رانا في وقت الزنا و الفسق نشوفوهم برا يوميا لازم تعرفي كيفاه تتصرفي اخرجي من دائرة هدا ولدي لي ربيتو و تحبيه يكون مثالي لالا كل الناس معرضة للخطأ و مش معناها كي تفرج يعني راهو بعيد على الدين لازم تفرقوا بين الدين و بين الاخلاق
Fadia :ابنك ليس ملاك حتى لا يخطئ تقربي منه وافهمي الموضوع حاولي تعرفيه لخطأ وكيف جاءتهم الفكرة والممنوع مرغوب لدى الطفل
Mima :كون جيت منك في هذ الموقف ماندير والو في هذيك اللحظة لكن اتخذ أكبر سبب من أسباب التربية السليمة الدعاء بالهداية والصلاح استعين كذلك بذكر قصص قصيرة فيها عبرة لواش حابة نوصل وكذلك الهواتف ممنوعة معنا باتا ولا أقول السبب انو يجيحك وكذا بل أقول له أن الهاتف يسرق منو حياتو يسرق منو تفوقو في المدرسة وتوفقو في الرياضة واستمتاعو مع اصدقاؤو وكذا...
Hadjer :الله المستعان التربية هاذ الوقت راهي صعيبة و الحق كامل أخصائيي التربية يقولك كن على استعداد في اي وقت أنو ابنك.يخون ثقتك فيه ولول لمرة واحدة المهم ربي يهديهم و يبعد عليهم الفتن حاولي تهدري معاه بشكل عام أن الله يسمع و يرى و أنه يعلم السر و الجهر حسسيه انك دايما واثقة فيه و متأكدة انو عمرو لا يخيب ظنك لا قدامك ولا في غيابك و لا يخون ااثقة لي انت راكي.حاطتها فيه .. أكيد هو راح يأنبو ضميرو و يرجع للطريق ربي يثبتهم على الحق و يحفظهم يغيضو هاذ الجيل مساكين كل.حاجة راهي متاحة ليهم تفتنو قبل وقتهم
Massilya :مكانش حل .... غير انك تهدري معاه ديراكت ... متقوليش لقيت ليسثوريك في التليفون.. قال هذاك الضحك انا يماك و نفهم.... تتفرجو و كذا و الثقه و محترمتنيش كون برا نقول شارع!... طيحت بيا يقولو يستغبى يماه و يتفرج عيناني في تلفونها!!!! حسسيه بالذنب كشغل جرحك و طرح بيك عاتبيه من بعد انصحيه ..و الأمور هاذو تكبرو و تعرفو ماش وقتهم،يتشوه فكرك و اختميها بحديث الرسول ص للشاب الذي يصبر و يتقي كفاش المنزله تاعو تكون ابحثي عليه وبلي جامي يجمع المسلم بين أمرين حلال و حرام في حياته يفسدولو عملو.. و خليه يهدر في الاخير..و الزمي الصمت في المعامله معاه مده كشغل زعفانه و غايضتك ...رتبي كلامك قبل و اهدري معاه
Lamia :واجهيه بالتي هي احسن ماشي تروحي ترخسيه راه في سن حساس فهميه أولا هاذ الشيء حرام لي شافو فهميه اذا غضب عليه ربي ما يربح ني فالدنيا ني فالآخرة فهميه هاذ الشيء طبيعي يكون تخمامو في هاذ الاموري بحكم السن لكن مالازمش يتمادى علميه يوالف اذا مال تخمامو يروح يصلي او يقرا القرآن او يمارس رياضة لازم مايكونش عندو وقت فراغي كبير و نبهي اولياء اصحابو لو مكانك نقولو اذا تقدر تشوفهم معايا هاذ المشاهد !!؟؟ نقولو انا تحشم مني و ربي ماتحشمش منو !!؟؟ خليه يراجع نفسو و ماتكونيش في دور الخصم او الجلاد وليدك بحاجتك كصديقة اكثر من ام في هاد المرحلة
Nessrine :التصرف المدروس انك تحكمي وليدك قصري معه بهدوء وفهميه الصح من الغلط والحلال والحرام راه في سن البلوغ والتكليف فهميه بلي الفعل هذا تع قوم لوط وخسف بهم ربي الأرض وبلي واحد بأخلاقه هو وعلمه لازم يكون مثال يحتذى به قوليلو الى حاب ربي يباركلك وتبقى ناجح متفوق تجنب هذه الموبقات ابنتي سبقيه دوما بخطوة راه الرفقة تلعب دور كبير دوك شافو مبعد يمكن يحبو يطبقو العياذ بالله حديثيه بدون خجل قوليلو لي يدير هكا يمرض ويلعنه ربي ويوم القيامة يتحاسب بشدة قوليلو اليوم ني حكيت معك بهدوء مرة جاية نخبر باباك بكل شيء.....ربي يجيب الخير نا ولدي راه قريب 11نحكي معه عادي وفكيت عقدة بيني وبينو فهمتو وقلتلو كان حاب تفهم فاي شيء احكي مع باباك ديما نتبعه فتصرفاته وننبهو لاحياء فالدين هذا وقت فرض علينا نحكيو مع ولادنا ونصاحبوهم خير ما يخرجو للشارع والمجتمع مغمضين يتوهو....ربي يجيب الخير ويهدي بالك
الواجب على الوالد مصاحبة ولده بعد العاشرة وبهذا يكون له خير ناصح ومرشد ومربي
ردحذفهذا هو سن الاكتشاف لابد من المتابعة والتذكير بمراقبة الله
ردحذف