السلام خواتاتي عند مشكل حبيت تنصحوني فيه عندي ابني عمرو 3 سنوات ربي يحفظو نرقد معاه في ارض يعني ماشي في سرير مع زوجي وهذا موضوع يزعجني حتى زوجي بصح ما يبينش نعطيلو حقو شرعي ماشي مقصرة لكن بضحكة يقولي نحس روحي ماشي مزوج بصح ابني متعلق بيا كان يرضع طبيعي كي فطمتو قلت نطلع بلاصتي بصح في ليل لاصق فيا وزوجي غاضني اعطوني نصيحة من فضلكم كيفاه ابني يرقد وحدو يعني حتى انا والفة رقاد مع وليدي وشكرا
Dalila :نحي السرير وهبطي ماطلتك فالارض بجنب ماطلتو انا هكذا درت
Mariem :يامدام طفل 3سنين ينام خارج الغرفة طول يخي يقولو الصغير شفاي كاين خصوصيات بينك بين زوجك لازم بنك مايشوف مايسمع
Lina :مم والفتيه صحا اقعدي معنقة ولدك حتى راجلك يحوس على لي تعنقه ويوالف بلاصتك خاوية نهدرو شرعا اكي داية إثم كبير في بعدك على راجلك كاين الف طريقة غير انك ترقدي فلرض وراجلك فوق السرير هذي بحد ذاتها إهانة ليك والله عاودي حساباتك ولدك المفروض عنده سرير تاعه ولفيه يرقد في بلاصته ونتيا في بلاصتك 3 سنين راه يكبر ويعرف ويفهم المشكل ماشي في ولادكم المشكل فيكم نتوما
Nassima :ديريلو سرير حذا سريرك
Khadija : الطفل لازم ترقديه وحدو ولا إذا عندو خاوتو صغار تولفيه يرقد معاهم في سرير تاعو اقعدي معاه غير يرقد شدي بلاصتك أصلا كاين بزاف أمهات يرقدو ولادهم معاهم وهوما كبار والطفل يقدر كاش مايشوف ويتعقد ولا يخرج منحرف أصلا الزوج تان عندو حق عليك بزاف نسا نهار كامل وهوما يجرو مور الشغل والأولاد وكي يجي الراجل عشية ولا فليل يريح يلقى مرتو معندهاش وقت ليه وبزاف راهم يشكو مالخيانة الزوجية انا نضن هاذي أحد الأسباب على خاطر مع الوقت والإهمال صدقيني يكره وتبرد العلاقة
Karama :شريلو سرير فيه ديسانيمي وديريه حدا سريركم وضرك يفرح بيه وفهميه بلي بلاصتك لازم تكون حدا باباه وهو راه كبر وخاصو يرقد فسرير تاعو وريه فيديوهات ديال أطفال يرقدو بوحدهم وقولو حتا نتا خاصك تكون كيما هادو وشوية بشوية غي يولف يرقد فيه فرقيه عليك وبعديه ولا ديريه فغرفة اخرى
Yasmina :يا حصراه غير تبانلك صعيبة انا وليدي كدرتلو شمبرتو قلت كيفاه يرقد وحدو و نخاف عليه و والفتو حدايا وووووو و من بعد والفت و هو والف يرقد وحدو كنقولو رواح ترقد معايا ما يبغبش يعني بداي تبعديه عليك غير بلعقل مثلا خليه هو وحده في لرض و من بعد يرقد في شومبرا وحده و يوااااالف عااادي
Hadil :علاش الزوج في مثل هذي الحالات يتصرف كأنو المشكل يخص الزوجة و هي اللي لازم تحلو هو علاش ما يشوفش حل علاش المرا دايما هي المسؤولة مثلا يحكم وليدو و يحكيلو قصص على رجال و على اطفال يرقدو وحدهم و يروح يشريلو سرير و ماطلة و يشري صبيغة لوليدو و يقولو عاوني نسڨمولك قلعة تاعك يا امير و يرقد. معاه الأيام الأولى المهم باختصار يتحمل هو مسؤولية وليدو ياك كي يزيد يسجلوه على اسمو نصيحة للأمهات نقصو ما تاخدو كامل المسؤولية خلو الأب يدي قسم كبير منها خاصة اذا كان طفل
حنا النساء ربي خلقنا رقاق و ضعاف علاش حملنا نفوسنا ههذا الكم الهائل من المسؤولية؟!!!
Lamis :خطا راكي غالطة بكل صراحة ولادنا وكامل نحبوهم وننحنحنو عليهم ورضعناهم ولكن كل وحدة لازم تعرف بلي الطفل لازم يرقد بعيد عليك وهذا سوء تسيير منك وهذا من الاول نفترض زدتي على وليدك كيفاش تتصرفي المراة لازم تكون حنينة وحازمة واقفة قافزة وراجلك ماشسدي قالها بضحكة راهو نبهك الراجل في اموره الخاصة يولي يخمم قل من تخمام وليدو لانه حقه وماشي غير في الفراش لازم تنظمي وقتك في كلش كاين نوع من الرجال يحب مرته ليه على بالي ضرك تقولولي هو ومايساعفش ولكن ااشرع معاه وانت واجبك ديريه وعلى اكمل وجه وماتخليش بلاصتك للشيطان وراجل يوالف بلا بيك
Jihane :ثلاث سنوات ، صاي يبدأ يرقد وحده ، ديريه في غرفة قريبة ليك ، شريله فياز ضوئها خافت باش ميخافش، خيطيله درا و غلاف تع مخدة شباب تاع سبونج بوب ولا سبايدر مان ، و خلي باب غرفته مفتوح ، رقديه في بلاصته و روحي لغرفته ، حتى تبغي ترقدي الدقيقة التالية فتحي بابك ، باش يلا خاف و جل عندك يلقى البا مفتوح
Malak :يبكي يوم ويومين ويسكت والحق الشرعي مشي زوج دقاىق ولا ساعة زوجك أولى بك في الفراش من وليدك وهذي تع وليدي مايقدرش يجي نهار وين يكبر ويعنق مرتو وانتي شوفي شكون تعنقي،الحديث قياس
Lamia :اشري لوليدك كنابي ومطرح ولصقيها مع سرير تاعك وخلي وليدك يرقد بجنبك وراجلك بجنك الاخر ويرقد وليدك اجبدي عند راجلك ليبدلك ويقولك مكيش مهتمة فيا هاكا تربحي وليدك حذاك وراجلك بجنبك تحسي روحك ف 3ف نفس سرير انا يبانلي هذا حل باه ترتاحي
Hala :اشريلو سرير ولصقيه مع سريرك هكا ترقدي في بلاصتك حدا زوجك وابنك حداك انا ابني 4 سنوات ماقدرتش نفارقو ونرقدو وحدو مام هو مايرقدش وحدو لازم حدايا
Sabrina :النصيحة ارجعي ولفي وليدك بلاصتو و ارحعي لمطرحك لازم تولفيه تتهبي نت مرات راجلك يروح معاه لبلاصتو مرة نت حتى يرقد و روحي لمكانك هكذا حتى يوالف مام يفطن يجي عندك رجعيه و روحي معاه حتى يرجع يرقد مهما نتعب مهما يبكو سواء زيدت نورمال ولا عملية رضع و نحط في بلاصتهم يالوكان الف مرة الحمد لله في ثلاثة ولادي مام نتعب و انا نوض نرفد نرضع في بونكي ماشي، في حجري باه مايتعلموش رفود تانو نعاود نحط ولف برك و كي يوالفو خلاص و عامين شمبرتهم الحمد لله
Lina :يا اما تهبطى الماطلة ترقدوا كامل في لرض
يا إما تطلعى وطلعى ولدك وترقدوا كامل فالسرير
ياخى سرير كبير يهزكم نورمال
Hanine :انا كيفك نرقد مع بناتي في بيتهم كي نفطمها ليامات لولين نرقد عندها تفيق فالليل مانديرلهاش حليب تبكي شوية تشرب لماء وترجع للصباح من بعد صاي والفت عادت كي ترقد ماتفيقش حتى للصباح نرقدهم ونروح لبلاصتي وشنو نخلي لبيبان مفتوحين وندير فيوزة نخاف نخليهم فالظلمة ونهرب لبلاصتي هههههه حتى انا والفت معاهم😁 هك درت مع بنتي لولة والثانية راني كيغير مافطمتها
Hiba :ثلاث سنين الله يبارك كبر ديريلا شمبرا وحده و حاولي تخليه هو الي يختار الأثاث و لون الصبغة و الاكسيسوارات بش يتشوقلها ... أما انك ما ترقديش في سريرك و تخلي راجلك هاذي انتبهيلها
Racha :ماكنتش نتخيل ولد متعلق بأمه كيما بنتي تضل لاصقة فيا نتحرك تنوض زيرت على روحي وفطمتها ممبعد وليت نخليها ترقد ونحطها في بلاصتها وكي تفطن تبكي وتجي عندي زدت زيرت على روحي كي تفطن نخليها في بلاصتها تقولي صح دبخيني وليت ندبخها ترجع ترقد نبات ندبخ ولات يدي توجعني بطلتلها طبيعة التدباخ تبكي وترجع ترقد حتى نسات ممبعد قلعتلها البيبرون تاع الليل ممبعد قلع البيبرون قاع تشرب الحليب في الكاس ممبعد قلعت الكوش وهي رايحة لااازم تتعبي باش تلقاي نتيجة تبكي مرة زوج نهار عشرة وتبطل الطبيعة هكا نصحني البيدياتر باش نقلع الحليب تاع الليل والحمدلله تهنيت
Yousra :شوفي اختي طبيعي توالفي ولدك وماتقدريش تبعي ولا هو مايقدرش يبعد والطبيعي انو ترقدي مع راجلك بدون فواصل ابداي بالعقل في لول ارقدي حدا راجلك وولدك من الجهه لخرى يعني انت في وسطهم ومن بعد ديري سرير ليه قدامكم وانت وراجلك في سريركم يكمل عام مثلا يولي هو اربع سنين ديريه ابعد خمس سنين صاي يولي يرقد في شمبرة وحدو هو يوالف شوية شوية وانت ثاني وهكا ترجعي لراجلك ماتقوليش صابر وووو او كاين الي يصبر يصبر ومن بعد يدون انذار يخرج ليها طول يخون مثلا ولا يكره لا قدر الله والزواج مش حق شرعي وفقط ........عادي صراحه نحس الحالات هده تصير بزاف لازمها علاج بالذكاء والحكمه برك وبالتدريج
انا ابني من نهار زاد دايرتلو غرفة تاعو سبيسيال ونبات رايحة جاية عليه صح نتعب مي والف بلاصتو خير ما يقعد لاصق غير فيا
ردحذفموضوع جميل شكرا لكن
ردحذف