واش قالو النسا في الجزائر على طريقة على الأم العصبية طريقةالتعامل مع الأبناء حفاظا على شخصيتهم من العنف والضرب
أتعصب واضرب ابنتي ذات الخمس سنوات كثيرا .. ما الحل قبل أن أسبب لها عقدا نفسية؟
Houda :ناقصك فيتامين د و مغنيزيوم هدو ديرو لقلقة و حاولي اقعدي مع روحك و ديري وعد بينك وبين نفسك بلي مدزبديديش تضربيها و لا تنهريها ديري ديما في بالك بلي راها ضعيفة و صغيرة و ديري حاجة في بالك كي متلقاش عندك الحنانة و العطف راها تعود تحوس عليها برا ليجي دير فيه ثيقة ليعطيها كلمة حنينة دير فيه الثقة و تعود متحكيلك والو وكل متكبر وتعرف صلاحها تبعد عليك راجعي نفسك ختي و زيدي اشربي هدو لفيتامين بزاف ملاح و حني على بنيتك راها ضيفة في دار باباها و حنا ضياف عند رب العالمين و هدي راكي تتحاسبي عليها و عيكي بصلاة و قراة القران راهم يطفيو القلقة لي بداخلك و ربي يكون في عونك حضنيها و تقربي منها على قد مجاب قدرك مزالها صغيرة مسكينة واش ذنبها .
Lina:انا ساعات نقلق بزاف نضربها صح خطراااات بصح نندم بزاف باسكو جايا حنينة عليا كثرمن ما انا حنينة على نفسي هههه والله نشوف دمعتها خلاااص نتقطع اروح نقلها اسمحيلي معلاباليش كفاه ضربتك في عمرها تسع سنين وهي تتحضني وتقلي معليش علابالي كنتي قلقانة بصح مجرد نقلها اسمحيلي هي ثاني تحس واش دارت وتقلي انا تاني درت هاذيك الحاجة وقلقتلك اسمحيلي انت ثاني ربي يحفظ وليداتنا كااامل ويقدرنا على تربيتهم جيل واعر بزاف😢
Mariem :بنتي 10 سنين بلاك ضربتها مره ولا زوج في حياتها كامل وتتكسر يدي قبل ما نحطها عليها خرجتلي احن مني علا نفسي ومتربيا
واش من قلب عندكم تضربو مخلوق ضعيف هوا خايف وانتي تزيدي 😨والله نموت ما نقدر نديرها حوجي نحس روحي ماشي عبد
Hala :تقدري تروحي تشوفي طبيب نفسي ختي ممكن عندك ترصبات منذ الصغر بسبب سوء معاملة الام ديالك ليك
Lamia :رقي ختي بلاك.كشما دارولك بينك وبينها. علاش مسكينة واش ذنبها ذوك.تولي تكرهك
Nassima :عندك ضغوطات راكي تخرجي فيهم في بنتك للأسف 😢😢 هي صغيرة ماعندهاش ذنب لازم تصلحي من نفسك 😔
Kamar :منيتك ختي... الله يهديك.... باينة الضغط راكي تخرجيه فيها ... علاه مسكينة ... دك تولي تكرهك ... غلي الرند والنعناع وشربي ملاح الاعصاب
Farah :شوفي اكيد انت تضربتي بزاف كي كنتي صغيرة بلا سبب على هذيك راكي هكذا لازم تعاودي تراجعي طفولتك كيفاش تربيتي و تحاولي تتجاوزي الأشياء الصعيبة فيها حتى و نكبرو الأشياء لي عشناها في طفولتنا تبقى تأثر على سلوكنا كامهات لازم نتعلمو نواجهو و نفهمو خطورة انه نحط أطفالنا في نفس المواقف لي عشناها
Basma :لا ماشي هكذا كبري خاطرك برغم مانيش ام حاولي معاها غي بشوي متلا تمشطيلها ڨولها بنتي شابة ومن وفي دراسة مكانش عنف هكذا تكره تقرا عوجات الخط معليش تعاود تكتبه ڨوليلها هذا احسن من هذا زيدي واحد شباب باه نفرح بنتي وهكذا حافظي على بنتك اختي
Khadija :شوفي الضرب ابرهش برغم قع نضربو مي انا وليت نعيط كثر من ضرب مهم انا كي نضربها نروح ليها تبوسها و نعنقها ابنتي حنينة بزاف عليا وحدة لحنانة مشاء الله عليه غير تشوفني ساكتة اجي ماما راكي زعفانة ماما راكي تبكي عيت ماما اقعدي ربي يحفظهالي و مع علم صح نتقلق منها كي متسمعنيش مي نحبها هي روحيلانو أكثر وحدة في دنيا تحبني و اخاف عليا صح و ترقد عندي و كي نعيا متحبش ترقد حتى تشمني و ترقد في عمرها اربع سنوات ربي يحفظهالي مشاء الله عليها سابقة لعمرها
Nour :شوفي ولله كنت كيفك
وليت كي نجي نضرب ابني نعض عل لساني ونروح بلاصة مفيهاش ابني نقعد نستغفر نستغفر تتنحالي الشحنة تع الغضب نرجع ليه نحكي معاه
Hadil :الحاجة لولا اذا عندك ضغوطات حليهم ولا حطيهم بجانب مدخليش الملايكة فالوسط
الحاجة الثانية ديري فبالك هاذي امانة عطاهالك ربي لازم تتهلاي فيها و تتهلاي فيها ماشي معنتها توكليها و تلبسها لالا الجانب النفسي عندو دور كبير متجرحيهاش و فهميها الغلط مالصح بطرق ذكية
ثالثا ماشي عيب تلجئي لطبيب نفسي مع الوقت راح تتدربي باه تتحكمي فالنفس تاعك
Yasmina :حاولي تستغفري و أكثري من قراءة القرءان ،و كذلك اتعلمي تتحاهلي تصرفاتها لي تقلقك،مثلا كي تعودي تمشطيلها في شعرها حسي بيها بلي ضريتيها قلها كي نضرك قوليلي و امشطي بالعقلو كي تعودي تقري فيها اذا مافهمتش و انت قلقتي حبسي و مباعد كملي ،العبي معاها احكي معاها الأطفال حكاياتهم حلوين ،حاولي تقدري النعمة لي عطاك ربي و استغلي كل دقيقة معاها ،كون تكملي هكا تجفا عليك و ربي يقدرك
Hanine :كي تقلقك بعدي عليها حتى تتكالماي طميلها شعرها بلا ما تمشطيه قوليلها يضحكو عليك خيرمن تضربيها و كي تتعوج ف القراية ارمي الكراس خيرمن تقطعيه حرام عليك تضربي مخلوق صغير بريء وضعيف تحبي ربي يعاقبك كل مرة تغلطي تحبي يبعثلك طيحة و لا فعصة ولا كسرة كلما تغلطي وعلاه تغبنو ف ولادكم لازم تساعفو صح نتقلقو بصح لازم بلعقل و بدون ظلم او اذية راكي ضريها و تعقديها و تذي ذنوب ودعاوي الشر من بعد تندمي وهي تكبر وتتفكر الضرب لازم تلقاي طرق عقاب وحدخرين تخليها دير الحاجة بصح مشي عقاب الي يضر ولا حرمان راهي صغيرة ارحمو صغرهم و ضعفهم و براءتهم و علموهم و فهموهم يولو وحدهم يحشمو على رواحتيهم وادا راكي تشربي موانع حمل يديرو القلقة او دوا غيريهم ادا نتي وحدك منارفية استغفري بزاف و اذكري ربي واعرفي ربي يحب الي يجبر بالخاطر ادا ما تغيظكش بنتك ديري واجبك كام و ماتظلميش و ماتحقريش ربي ينتقم من كل ام وأب يحقرو ولادهم و يضربوهم
Moufida:هذا الإنسان الصغير ما عنده حتى ذنب في المشاكل اللتي نواجهها يوميا انا ولدي ضربته بلاك 5 مرات في صغره لما كنت بالحمل باخوه وراني ندمانة
اخدمي على نفسك وعرفي وعالجي الخلل لي راه مقلقك منها ممكن انك مريتي بتجربة حمل شاقة او تدهورت حالتك لما انجبتيها ممكن راك محملتها ذنب شيئ وما كيش عارفة
شوفي ختي كي تنوضي صباح خدي قرار بعدم القلق والنرفزة بصوت مرتفع واقنعي نفسك بهذا وادعي الله يعاونك وغادي تشوفي الفرق
Hiba :كنت كيما انتي درت تحليل لقيت عندي نقص فالفيتامين د ومغنيزيوم هوما لي يديرو التقلاق والغضب وملي شربتهم تحسنت
Hadjer :اشربي المغنزيوم مهدئ خاصة في الليل
كما أنه غير مضر و حاولي جعل و لو نصف ساعة استرخاء في اليوم خاصة بك وحدك ستتحسنين
و الاهم من هذا كله كثرة الاستغفار
Zina :المشكلة فيك انتي يعني صح كل الأمهات يتقلقو مي الضرب والتعنيف ممنوع كليا سواء جسدي ولا لفظي .. شوفي مع روحك يمكن كنت تعاني من الظلم والظرب في صغرك او عندك عقدة معينة اتجاه لبنات تفكرك بحاجة في صغرك أو انتي عصبية زيادة على اللزوم وفي كل الحالات لازم تواجهي روحك مهما تكوني تحت الضغط يدك شديها ليك وقولي في نفسك ماندمرش بنتي هذا واش نسعى ومع التكرار راح تتنحالك هاد الحالة .. إذا انتي مادرتيش فيها خير ومارحمتيهاش واش تتوقعي من البراني أو المعلمة أو المحيط تاعها ..خمي بعقلك واش الأضرار والتشوهات النفسية اللي رايحة تنوضيهم في الطفلة تخليلها عقدة مدى الحياة
Ghada:استغفري بالله تتحسبين عليها يوم الاخر وذا احسنتي معملاتها وحنتي عليا راح تكسبي ثواب في الدنيا ولاخرا عندي ولدي قد عمرها كي مايكتبش مليح نشجعو ونصفق ليه ونقليه عاودها مرا زوج تلاتة حتى يتحسن ويكتبها مليح نتي هكا ركي تكرهيا لقريا ومن الخوف من الضرب تفقد التركيز يعني نتي راكي غير تتعبي فروحك حبسي الضرب وشجعيها وحني عليا هداك هو المفيد (المال والبنون زينة الحياة الدنيا)
Zahra :شوفي فيديوهات وفيديوهات وفيديوهات عن التربية الصحيحة ومخاطر الضرب والصراخ على شخصية الطفل رايحة تتعلمي لانو التربية راها علم لازم نقراو عليه ونعرفو اسرارو وفنونه
Nabila :الله يهديك يا ختي ديري في بالك بلي هذي امانه مدهالك ربي تعتني بيها و تربيها تربيه سويه و تربيه مليحه و ديري في بالك بلي راكي تكوني في انسان راح هو تان يربي اجيال بنفس طريقة لي راكي تربي فيها بينتك ضرك
و وش ديري ضرك رح يرجع ليك في كبرك احسني اليها مدامها صغيره بش تحسن ليك كي تكبري
مشي تخدمو كائن معمر عقد نفسيه و كي تكبر متقدرش تأسس عايله ولا متقدرش تتعايش مع الناس تخرج منعزله و تكره روحها و تكره الدنيا و متعرفش تقرى تولو تجراو عند الاطباء النفسيين و ترقو و بلاك تان تزيدو تأزمو الوضع و تولو تعايرو فيها عالجو المشكل قبل ميوقع
الا عندك ضغوطات ولا تحسي روحك انسانه مشي قد المسؤوليه ولا تكرهي بنتك بدون سبب شوفي طبيب نفسي بلاك عندك شوك قديم ولا حاجه صراتلك مع عايلتك بكري كانو يعاملوك هك ولا شيء من.هدا القبيل شوفي طبيب نفسي متخرجولناش جيل مريض نفسيا يرحم الشوابين
فالحق راهي مونساتك تصاحبيها تلعبي معاها تضحكي معاها تعلميها صوالح جدد طيبو كيفكيف تعاونك فالدار متخرجيش الضغط.لي فيك فيها هي راهي بريئه ولا حول ولا قوة لها.
والطفل العصبي الذي لا يكف عن الشغب والحركة ويقلب المنزل رأسا على عقب وكثير الصراخ كيف نتعامل معه😔
ردحذفالصبر ويكبر الطفل ولا يبقى من طفولته إلا الذكرى
ردحذفالطفل بحاجة لمن يهدئه ويعطيك الحنان لا لمن يحطمه ويسيل دموعه .. البراءة نعمة لا تكسروها يا أمهات بعصبيتكن
ردحذف