واش قالو النسا في الجزائر عن أهم أسرار المطبخ والحيل المنزلية
سلااام عليكم
يااا نساااااا
كل وحدة فيكم تمد معلووومة على الكوزينة لي لازم كل مرأة تكون تعرفها
مثلا كيفاه نستحفظو بالخضرة مدة طويلة
المهم اساسيااااات المطبخ والمنزل
Nour :الخضرة كيما البطاطا والبصل والثوم نشري بزيادة جامي نتخص طوماطيش زرودية حشيش معدنوس كرافس نشري قيس سمانة نغسل نشف نقطع ونعمر لي بوات ونحط في الكونجيلاتور باذنجال لفت قرعة شوفلوغ نشري نهار نطيب بيهم والموسم تع الفلفل الحار ولحلو نشري كمية كبيرة نخدمو في نهارو ونعمر بورت مونجي كبيرة و نرقدو بزيت الزيتون جلبانة ولوبيا موشتو ولحميصة ديما عندي في الكونجيلاتور زيتون أكحل في بواطة في لفريجيدار مع بواطة فرماج وفرماج شيدار نرابي ونكونجلي زيتون اخضر مقطع في الكونجيلاتور نزيدو مع الروز عندك العولة كيما روز عدس بواكاسي عدس حمر لوبيا انت واش يحبو ياكلو طماطم علب نشري تع الكيلو ونفرغها في بلارة ونغمرها بالزيت ولهروس تاني في بلارة نفس الشي بسكو ندوزن بيهم لي زيبيس نشري قيس عشرالاف كسبر فلفل كحل كمون وفلفل دريس والعكري راس الحانوت قرفة كروية وقرفة عود نحب لحشاوش كيما زعيترة رند ثوم بودرة لحبق مرحي زعفران زنجبيل بودرة les herbes de Provence هادو مايخطيونيش تاني لي زيبيس تع ماريني وشورما ولي زيبيس تع الجاج وشطيطحة ولحرور بيدون خمس ليترات زيت فرينة عشرة كيلو ونفرغها في بيدون هي والسميد خميرة الخبز القابسة لكبيرة وخميرة نوارة السكر خمسة كيلو في بيدون هو تاني زيت زيتون قرعة جيب ختها ولادي يزيدوه تقريبا في كلش معجون تع كيلو زبدة صول وكيلو ماكسون آتاغتيني يديروهم ڨوتي البيض نشري بلعشرة حبات قهوة 1001 وحليب لحظة تع كيلو ماتعرفيش وقتاش طيحي اومبان خل وما زهر وفينيڨغات نخدمها وحدي وتخرج كيما تع لوسيور فريك فرميسال تليتلي لي بات لازمين في الدار سلاك الواحلين نروحو لي ديتارجون انا الصابون السائل نشري تع البيدون ونفرغلهم في لقرع تع الصابون وحدة في لي توالات وحدة في صال دو بان وحدة في الكوزينة وتع الكوزينة نزيد معاها ديتول نشري القرعة تع ليترة نشري زوج انواع تع الصابون ونفرق بين التوالات والصالدوبان ايزيس وجافيل وجافيل رغوي خمس ليترات صابون الماشينة لايف تع عشرة ليترات وواحد لوشا مع ادوسيسون وواحد جافيل الملابس البيضاء بلارة تع عملاق ولكريستو وشكارة تع تاست لي تابي بريلاكس و WC Dose لاف صول و désodorisant لافات بونج واجاكس لي ڨون صاك بوبال بابي فيلم بابي sulfurisé مع الومينيوم صاك دو كويسون وبابي رولو صابون سيدو اونتي طاش وصابون مارساي دونتيفريس وبان دو بوش ليستيرين هادو حوايج الدار كيما لي شومبوان ولي جال دوش نشري مرة في تلات شهور بسكو ولادي مدايرتلهم شومبوان حجم كبير عائلي مع جال دوش ديالهم راجلي حوايجو وحدو وانا تاني دوزاني وحدي صافي نعرف وش يكونصوميو لي بوند نشري كارطون وبابي ايجينيك تاني فيما يخص الجاج واللحم والحوت نشري ليلة قبل الاستعمال بسكو انا ضد اللحم كونجلي
Hala :الخميرة تاع الكسرة حطوها فالثلاجة بش يبقا ديما مفعولها مليح
Mariem :من الافضل تشرو السميد والفرينة 25 كلغ متخطيش م دار قاع و الخضرة صرفو تع سيمانة باه متخسرش وتكملك سيمانة
الفرماج تع البيدو غطيه بابي سويتو ميدرش الما
القصبر والكرافس ديريهم في حاجة تع بلاستيك وغلفيهم بابي سويتو ثاني باه ميكحالوش
Maram :البصلة دايما حطيها بعيدة ع الخضرة لانو تفسدها و تذبلها بسرررعة خاصة البطاطة
T
Yasmina :البلارة لازم نغسلوها بماء ساخن جدا باش تتعقم و ما تفسدش الحاجة لي غادي نحطوها فيها ..السلك ولا جاكس لي نغسلو بيها الماعن في الليل نغسلوها مليح بالماء و نعصروها و نرشو عليها من الخل الابيض باش تتعقم مليح ومتحكمش ريحة مش مليحة .. كي يسيح الزيت في الارض لموه بالفرينة .. هذا وش تفكرت
Batoul :باش ما تكونش ريحة فالثلاجة خلي دايما كاس حليب اوقطعة زبدة بلا غطاء
Lina :الحشيشة و المعدنوس بش يشدولك وقت طويل و ميذبالوش اغسليهم و نشفيهم مليح ب الپاپي و حطيهم ف بوغت مونجي و ديري مغرفة ف وسطهم ولا فرشيطة و اغلقي عليهم مليح و حطيها ف فريجيدار يشدولك وقت طويل مليح ف رمضان
Camilia :البسملة في بداية كل امر كلش يجي مريقل
Rima :لحم العاصي حطي معه مغرف اينوكس وسكري الكوكوط يطيب زبدة
Jihane :البصل يكون مقطع ماشي مرحي كي يكون مرحي يطلق الماء مر
تمرقي بالماء الدافي
التقلية مليح قبل ماتمرقي
والنار المتوسطة
لعجينة تاع مملحات ولا بيزا كي نكمل ندلكها نزيد مغرف كبيرة زبدة
تشكتشوكة تاع المحاجب نرحيها نص رحية و نديرلها شوية زيت زيتون تتنكه وتجي بزاف بنينة
وين تكون طوماطيش ندير مغيرفة سكر تنح لقروصية تاعها
Nour :دنجال باش ميشربش زيت ،اذا درتيه للفطور بيتيه في الماء واذا بغيتي تقليه للعشاء ديريه من صباح في الماء,,,,ومتنسيش تحطي فوقه طبسي باش يغرق في الماء,,,صدقيني عن تجربة زيت يقعد كيما هو حتي نرميه،،ويطيب كيف كيف 😋ملاحضة مشي تحطيه ساعتين في الماء وتقولي شرب زيت،،ايا لي عندها دنجال تبيته الليلة وغدوا تقليه وتردلنا لخبر😉
Hanine :عجينة لمحاجب زيديلها زوج مغارف زيت ..باش كي يطيبو ماجيش ايلاستيكي
Mariem :شوفلار كي تغليه باش تتخلصي من ريحة رمي في القدرة كي تغلي مغرف فرينة،،،نتيجة واو
Lina:كي ندير المرقة البيضة فالتقلية نديرلها مغيرفة صغيرة مايزينة تجي خاثرة
Hiba :احمحمحم نبدا على بركة الله لمسمن ندلكوا بالبارد مش سخون ويدلك باليابس مش مطلوق على فكرة جاء خرافي شخشوخة باه تجيك بنينة قبل ماترحي لبصل حمصيه مع شوي زيت ورحيه باه كي ترحيه مطلقلكش لمرار فالاصوص بطاطا قبل ماتقليها قطعيهل وديرلها مغرف خل كي تقليها تجيك كيما تاع برا العجائن دائما متخليهمش يكملوا طيابهم باسكو كي طفي نار راح يكمل طيبهم يجوك مجمولين يهبلوا خير من ملبزين صوص تاع لبيتزا ديرها فوق عجينة وخليها طيب عاودي نحيها وزيد مغرف صوص وديري فرماج لازم يدخل فوسط صوص كي طسيها وتنحيها راح تجيك تهبل وفرماج سائل ويسيل خيرمن تكون يابسة لفطير باه يجيك طري زيدلوا شوي خمارة كسرة يجيك يهبل جاج لاكنتي راح تحمريه تبليه وخليه ليلة قبل فالفريجيدار
Yasmina :يا عمري طبخ امي الله يرحمها تحط كل شيء مع بعض تويل كاملين مالحم البصل الثوم الطماطم حب ولا لمصبرة وتقلي وتمرق بماء سخون اي طبق هكذا تطبخ و تجي مكلتها بنيييينة سكر وعل ذكر السكر قبل ماطفي تحوط جوى فلفل وقرصة سكر الناس كامل يقلولها طيبينا فالاعرس
Maram :كي تكوني تطبخي بلا فيوند والا بولي قلي لبصل مع شوي سكر يعطيك طعم لفيوند علامة
Hala :نزيدلكم انا منديرش لاصوص فرماج فطاكوس ندير بشاميل ونديرلها شوي فرماج رابي وحد البنة ويجي معلك مداخل
Farah :العجينة تاع رقاق نديرلها مغرفة خل تجي علكيف ماتقطعش
Batoul :لاجينواز نزي.لها نص كأس ماء تولي كيما نتع المحلات
Karama :سلاطة ذبلانة نحطها في الما مع رشة سكر تتجدد ووراقها يخضارو وتشد روحها واللي عندها بحيرة تع نعناع ودبشة ومعدنوس كي تجي تسقييها تزيد شوي سكر فماء السقي وراح تنبهر بالنتيجة
Lamia :اللي تحب ماتتعبش في الشغل تع الدار تسبح الله 33وتحمد33مرة وتكبر34مرة هذا حديث النبي عليه الصلاة والسلام
Racha :اكتشفت انو جمع فتات الخبز وأكله يجلب الرزق والبركة سبحان الله ورميه تهلكة كبيرة
Farida:اكتشفت بلي الاكل كي تديرو ببصل مقطع يجي بنين خير من بصل مرحي وبشهادة الجميع نهار نديرو مقطع كامل يشكرو فبنتو 😊
Rahma:سر نتاعي انو لبلا ولا اي حاجة تنحرقلي نحكها باي بوشون عندي وسلاطة مين تذبال نديرلها سكر ترجع جديدة
Ghalia :مثقبة ومقروط لتفتحلك في مقلة عاودي غطسيه في ماء وقليه
Fatima :اكتاشفت بلي كي نكون نختم في المصحف يكفيني الوقت نخدم شغلي و منتعبش بزاف وو قتي يتنظم
و كي نحبس قراءة القران نتعب ميكفينيش الوقت و حاجة متتنظم ....نعم هذه بركة القران
و مع مرور الوقت اكتاشفت بلي لازم نقلش عمري انا لولة الحاجة لعزيزة والبنية والغالية والناعمة والحنينة واللوكس ليا ماشي غير دراري والراجل والضياف وووو انا اللولة المومن يسبق في نفسو
Amina :كي تخلطي الكرانتيكا بالباتور تتحصلي على هاذيك القشرة السوداء الشهية كي تطيب
بصح كون تخلطيها بالبرا ميكسور تجي مشققة وتعيف من فوق
Asma :كي تكون المقلة تلصق
نسخنها و ندير فيها شوية ملح و نمسحها كامل بالملح و هي سخونة من باعد نمسحها مليح من الملح و نطيب فيها تولي ماتلصقش
Wahiba :صلصة طماطم لازملها قرصة سكر و لي جي فلپيتزا لازملها زعتر بنتو فالپيتزا مشي نورمال
Hanine :لوبيا ولا عدس بعد ما يطيبو نحكم غراف لوبيا ولا عدس ونميكسيه ونزيدو تجي بنينة كثر وكثر
البنة فليدين كاين لي تتوفر عندو كل المكونات لكن طيابو سامط وكاين غير حاجة قليلة يخرجلك ماكلة ماتتشبعش
ردحذفقاعدة نقرا في المقال ومحبيتش يخلاص 😢
ردحذفاستفدت بزااف برافو لحراير يجعلها في ميزان حسناتكم