واش قالو النسا في الجزائر على طريقة تعليم الطفل الثقافة الجنسية وحمايته من التحرش
سلام أمهات من فضلكم كيفاش علمتو أطفالكم ميخليو حتى واحد يتوشيهم في المناطق الحساسة .. بنتي عمرها ست سنوات معرفتش كيفاش نعلمها وكذلك خوها قل منها خاصة كيفاش تحميهم من التحرش.
Lamia :لزم تفهميها ممنوع لمس ممنوع تخلي اي شخص يمسك حتي انت متمسيهاس خليها هي تغسل عادي بشوي تفهم عمرك لا تستعملي لعنف
Souhila: لازم تحكي مع وليدك ولا بنتك في سن وعمر مبكر وتسميلو أجزاء الجسم لازم يعرفهم،بأسمائها الصحيحة، هكدا باش اذا جا واحد حب يتعدى عليه يعرف يعبر على واش صرالو بالمسميات الصحيحة وحتى الشخص لي يقرب ليه يولي يخاف منو يهدر ويبهدلو
Rima:علمي وليدك حدود جسمو وبلي ماشي لازم حتى واحد يمسلو الأعضاء نتاعو الخاصة، وأنه لا ينبغي لأحد أن يلمس أعضاءه الخاصة.
لازم تعلمي وليدك ولا بنتك تحكيلك كل حاجة تصرالها مهما كانت بسيطة .. مكانش أسرار بيناتكم.. حتى إذا وصاهم شخص آخر ميحكيوش لازم يحكيولك نتي.
Amani :لازم تولهي وليدك ولا بنتك أنهم ما يخليو حتى واحد يصورلهم أعضاءهم الخاصة ولا يمدلهم صور عارية.
علّمي وليدك وبنتك يطلبو المساعدة إذا ما صرالهم موقف ماشي مليح
Rahma:لازم وليدك ما يخافش منك ومن باباه تعاقبوه كي يحكيلكم .. فهميه بلي نتوما راكم تحميوه وملازمش يخاف من المتحرش
لازم وليدك يفرق مابين اللمسة الجيدة والسيئة وبلي لي يلمسو بشكل يخليه ماشي مرتاح يحبسو عند حدو وبقوة.
Imane :علمي وليدك يكون حذر ماشي غير من الغرباء حتى الأقارب وبلي ماشي لازم حتى واحد يشوفو عريان وخبري طفلك ولا يقيسو في جسمو
Batoul :انا بنتي عمرها 3 سنوات ما تخلي حتا واحد يشوفها ولا يديها للتوالات حتا باباها ممنوع تقوللهم عيب و ما تخليش حتا واحد يشوفها بلي سوفاتمو تاوعها غير انا برك وانا دك نحير كيفاه بنتك ف هاد العمر مزال ما فهمتش بلي ديك المناطق ممنوع
Nassima :ست سنوات راهي كبيرة وتتفهم فهميها لأنو سبع سنوات في الشرع يعتبر سن التمييز تعود تعرف تميز عورة الرجل من المرأة فهميها وأدبيها بضرب تأديبي
Mariem :إسألي نفسك هل هملتي هذا الجانب يليق من تكون صغيرة تعلميها الحدود لكلش مثلا وانت تدوشيها من عام تخبريها واحد مايمسك واحد مايشوفك من غيري انا نضفلك إلى أن تتعلمي وأيضا وضحيلها حدود اللمس انا نقول لبنتي دائما ماتخلي حتى واحد يلمسك ونفهمها المناطق وإذا لمسوك خرجي عينيك وقولي أطلقني وخبريني قوليلها هم درك تتعود ربي يوفقك
Lina:عادي قوليلها عيب لازم هذي المناطق تستريها و تغطيها و ما توريها لحتى واحد
و مين دوشيلها خليها لابسة حاشاك سليب و غلسيلها و علميها تغسل هذوك المناطق وحدها اخرجي عند الباب و قوليلها شدي اقلعي و غسلي مين تكملي عيطيلي
نشفلك
Farah :سلام أختي الثقافة الجنسية لازم تكون عند الأطفال هو ينخلق بيها والوالدين يزيدو يعززها ..أنا عندي طفلة 6 سنوات من عمر 4 سنوات نقلها متخلي حتى واحد يعريك ولا يمسك حتى ولو كنت أنا ولا باباك علميها تقعد .علميها انو الأماكن الحساسة عيب شخص آخر يلمسها ولا يشوفها وأنت أختي في هاد الحالة كاين خوها حتى هو لازم تهدري معاه و متخليهمش بلا عسة .هناك بما يسمى زنى المحارم لو ما تزيريهمش من دك في زوج يا أختي راح تكون كارثة أمبعد .عمرها التربية ماكانت ساهلة لكن الإنضباط في أمور واجبة على الوالدين بما أنو لحق وقت وين في زوج يفهمو لازم الجدية وبالتوفيق حبيبتي ربي يحفضهملك نشاله
Hanine :انا وليدي موعيتو من لي بدا يعرف بلاك قل من ثلاث سنوات
هذي ممنوع تخلي واحد يمسك ولا يشوفك عريان
ولا يقلنك مسني انا ولا تشوف واحد عريان
دك عندو ستة سنوات حوايجو مايبدلهمش قدام اي واحد
حتى انا ولا باباه ولا ختو لي عندها عامين
وكان صغير نشفى جات عمتو تبدل حوايجها غمض عينيه وخرج
نخلعو فيه
بنتك ستة سنين رهي كبيرة ، لازم كل وقت تنبيها
Lamis :انا ولادي ربيتهم على عيب عندك يشوفني واحد منلي كان عمرهم عام ضرك بني وبنتي سنة خامسة قطعيهم طراف طراف ميبدلوش حتى قدام باباهم وحتى بنتي عامين تقلي لبسيلي يشوفوني ومتخلي حتى واحد يغسلها من غيري وعزوجتي
Asma :6 سنوات راهي كبيرة من مفروض من بدات تفهم 3 سنوات انا علمت بناتي ممنوع اي واحد يمس هذيك منطقة ولا يشوفها عيب و عيب والله بنتي ضرك 7 سنوات راحت دير ابرة لقات طبيب والله مخلاتو يشوفها ههههههه قاتلي انت قولتيلي ممنوع قتلها بصح طبيب قاتلي لا راهو راجل حتان جات فرملية باه دارت ابرة
Ahlam :عرفيها على مناطق جسمها وان جسمها خط احمر لا احد يمكن لمسه ماعاداك انت امها ومن أجل التنظيف فقط لا يمكن العبث بها كما لا يمكننا العبث بأعيننا فهميها بهدوء واشرحي لها حسب سنها تفهمك بإذن الله تعالى
وحتى أخوها يجب أن يتعلم
التربية الجنسية للاطفال وفق القواعد الفقهيه هي بشأنها تحمي اطفالنا بإذن الله تعالى
Nadjet :انا ولدي طفل عنده 4سنين نهار كامل او انا وراه عيب عيب
ابداي بروحك مثلا انت كي تبدلي حوايجك قدامها قلها عيب غمضي عينيك ولا اخرجي
ولا كي تدوشي او تكون معاك المهم ابداي بروحك باش تعاندك تولي دير كيما انت
Nour :فهاذ السن كامل الاطفال يكون عندهم حب الاكتشاف في جسمهم والمحيط تاعهم ويطبقو ذلك فاللعب مع بعضهم البعض على هاذي لازم تردي بالك كي تشوفيهم يلعبو لازم بكونو على عينك وكي تكوني دوشيلهم تنبهيهم وتحذريهم انو ممنوع اي كان يشوفهم او يلمسهم حتى يكبرو ويولو يعرفو لازم ماتغفليش عليهم وقت اللعب وربي يستر
Fadila :انا وليدي 4 سنين معلماتو منحوش حوايجنا و منبدلوش قدام ناس و عيب ...ضك يجي يبدل يقول لبباه عيب ميحبش يبدل قدام حتى واحد من غيري ...من صغرو وانا نهدر ربي يسترهم هذا مكان .
Yasmina :من الصغر كان لازم تعلميها انها منطقة محرمة بكل ما للكلمة من معنى و انو ولا واحد يشوفها او يلمسها الا امها في حالة وحدة كي تنظفها ولا اختك ولا اخوك ولا ابوك ولا خالتك ولا عمتك ولا مخلوق وقوليها بنبرة صارمة ماكاش التمسخير ....انا بنتي في الصيف ما نجي نحيلها الفيزو حتى نهبل تقولي ماتعرينيش....
ربنا يحمي أطفالنا وأطفال المسلمين يا رب 🤲
ردحذفجريمة في حق الطفولة
ردحذف