أعشاب وتوابل مميزة وفعالة للطبخ الشهي والعلاج المنزلي 2024

واش قالو النسا في الجزائر على أطيب التوابل وأكثر الأعشاب فعالية في الطبخ والعلاج المنزلي 

سلاااام👋

الفحلات نبقاو في المطبخ كل وحدة تعطينا عشبة او عقار من العقاقر الي نطيبو بيه و فائدة ديالو 

مثلا كمون و زريعة البسباس و حبة حلاوة لليڨاز 

قرنفل الراس ديالو الي يجي من فوق ينقص آلام الضرس

نعناع مهدي للأعصاب

قشرة القرع الكبير للشقيقة...قرعة لكبيرة تيبسيها و تعصبي بيها هادي قالتهالي واحد لعجوزة 

كل وحدة تزيدلنا و تفيدنا.

Ghalia : زريعة البسباس مليح ليغاز و ثاني للوسواس ترتاحي منو.

Hafidha: الكركم مقوي جيد للمناعة ايضا حبات الهيل .

Batoul : قشور الرمان ملاح للمعدة هو و الحلبة.

Nassima: قشور الرمان مام ملاح لالتهاب اللثة وتغسلي بيه المنطقةوالحساسة يعني تنقعيه في الماء ومن بعد تغسلي. الزعتر مليح للتسمم ديريه تيزانةولاقريب 

Aicha: زهور البابونج تيبسيها وتغليها في لما وتشربي منو مهدئ ويشفي من آلام الدورة الشهرية ويخفف آلام الحمى.

واذا غسلتي فلما هذاك شعرك راح يغذيه ويخفف لون الشعر حتى يولي أشقر بمعنى بديل للصبايغالشعر الكيميائية.

Hadil: الزعتر مغلى ساخن مليح يصفي الرحم خاصة أثناء الدورة الشهرية أو بعد الولادة أو عند الإجهاض أنصح به بشدة.

Lamia : مشروب الزنجبيل الساخن مفيد جدا لنزلات البرد المصحوبة بفقدان الصوت خاصة حين يخلط مع العسل .

Mounira:قشور رمان تيبسيهم وترحيهم وتخلطي مع لعسل حرة مليحه لأنفيكسيو.

Halima : القرفة عود في الأطباق البيضاء بنة ما شاء الله كيما الرشتة بالصلصة البيضاء والشربة البيضاء.

Fadhila: قشور الرمان للقولون 

Manal: الشيح مليح لمرضى السكري والنعناع يخفض ضغط الدم والخزامة تنظف الرحم.

Fulla:قشور الرمان للمعدة 

 لفت والبصل للكحة.

Tina: الزنجبيل مع الحليب يهدئ السعال.

Mina:تيزانة راني نايضة نديرها مهدئة الاعصاب ومليحة للمعدة .

Dalal: الكركم  مضاد التهاب.الزعيترة والثوم  مضاد حيوي.

Hanine :الكرموس و الزيت الزيتون للعظام و نقص الكلسيوم.

Jouhra: الزعتر لنزلات البرد تيزانة زراعة البسباس الأمعاء النعناع لتهدئة الأعصاب .

Khadija :لي عندو ليكيس في الرحم عشبة القطف المسوس عن تجربة.

Farah :الشيح يفيد للكليسترول وكذلك للرحم لي عندها برد يطحن هو مذاقو مر لاينفع لمرضى السكري بين صباعتيك مع كأس ماء وكذلك في ايام عيد الاضحي 

Lamia :الرجيلة : لها فوائد كثيرة مثل علاج جميع جروح الداخلية للجهاز الهضمي و خفض مستوى الكوليسترول و الضغط و تقي من جلطات الدماغ و القلب و.......  .

و مفيدة للبشرة و للتجاعيد و تأخر الشيخوخة و..........  . و الفوائد أخرى عديدة.

Mima:سكنجبير او الزنجبيل يديروه قاع فالماكلة مليح للحساسية و لكن ضروري فالحلو في بلاصت الحرور يحرر الماكلا و يخلي المرقة قهوية و نجمة الارض مليحة فالحلو و فالحريرة الكروية و النوخا و الرند يتبع اللحم لي فيه شحم يقلع كوليسترول.

Dana: قشور الرمان مليح الطياب الفم (les aphtes ) الكركم مفيد بزاف لالتهاب المفاصل النعناع مليح لظغط الدم والثوم تاني مليحة بزاف للظغط الدم وللكحة.

Samah: أنا رني مع الشعير مرهوش يخطيني مليح للكولو المعدة و السكر وبزاف فوائد و حب الرشاد مليح العضم الكسر.....

Samia : الكركم العظام و الكمون الغازات و الزنجليل لكلش مليح.و القرفة لداء السكري و القصبر للكولون.

Mariem :كمون لخضر ينقص وجع تاع العادة مي ميتشربش ديما يدير العقم

زريعة البسباس دخل الكرش تاني مليحة

مام كمون لكحل حب تغزيه وتشربي معاه الماء ينح النفخ.

Fatima : تيزانة معدنوس مليحة (للحجر تاع كلاوي).

Naoual: لي عندها هشاشة العظام..احكمي كيلة حب الرشاد  كيلة  زريعة الكتان كيلة  جلجلان  وكيلة  كركم  مريح وكيلة بشنة  مرحية وكوليهم  مع ياغورت  ولا حليب.

Yousra :القرفة لتخفيف الم  العادة الشهرية 

الخزامة تستعمل كتيزانة  لعلاج الم الصدر و الحنجرة 

الكسبر لانخفاض الضغط الدموي 

الجلجلانية مرحية مفيدة جدا للكالسيوم.

Souha: حب الرشاد لاغتغوز  اي الانزلاق الغضروفي.

Mamat hamza : شوفي رحت لميمتي دارتلي المر والصبر ضربه ضربه للبواسير والشق الشرجي شراتهولي وداراتو في المهراس وهرساتو مع الشحمه ودارتولي تحميلات  وشويه هرساتو ودارتولي في التمر نفطر عليه.

Lamis :انا جربت بذرة الكتان للقرحة المعدية 👌ولحريق اللي يجي ماليستوما لكن بالمداومة

Amina :قشور الرمان تخفف آلام المعدة و الشيح في الماء ينقص من مرارة الفم و فصوص الثوم في الماء على الريق ينحي الديدان و العسل في الماء الدافي على الريق يصفي الدم و ينشط الجسم

Kamar :20 غرام من كل حاجة 

زريعة البسباس 

نعناع يابس

خزامة

سانوج

حبة حلاوة

نخلطو الكل مع بعض  غلي كاس ماء وحطي مغرقة كبيرة من خليط هاذ الاعشاب وغطيها وخليها تريح واشربي مدة 15 يوم  من بعد حبسيها سمانة وعاودي 15 يوم وكي يرتاح القولون ولي كلما تحسيه يوحع ولا كليتي المعجنات اشربيها والله عن تجربة احسن علاج لكن لازم المداومة  وبالشفاء للجميع.

Line:مردقوش ومرامية مليح لتنظيم الدورة الشهريةومليح للمبايض عند النساء.

Malak:السانوج :الكحه .الديدان .الام الراس 

حبة حلاوة زريعه بسباس للغازات

النعناع مهدى . يعدل ضغط الدم 

الزعتر : تعديل السكر .تعديل ضغط الدم .السعال .تقوية المناعه 

الرند :التخلص من الحموضه نزلات البرد la grippe 

المعدنوس : يساعد على التخلص من الام الكلى والتخلص من الحصى

Siline:الثوم للديدان 

الجلجلان لهشاشة العظام

الرند للغازات 

الحلبة و السيونج للخلعة 

الشيح المقطر للمعدة 

قشور الرمان للكولون و المعدة 

الخزامة للالتهابات 

الزعتر للسعلة و لاقريب

اكليل الجبل للكولون

زيت الزيتون و عسل حر لجميع الامراض 😊❤

Joujou :الثوم مليح للطونسيو ،قشور الموز والرمان ملاحه الأوجاع تع ليستوما ، الشيح مليح للدياري ، النعناع الاخضر وزريعة البسباس ملاح لليغاز ، القارص مليح للطونسيو والسكر ودواء طبيعي الكولسترول ، القرعه مليحة البنكرياس خاصة لمرضى السكري نوع 2، زيت الزيتون والعسل مليح لكل انواع المرض خاصة الأمعاء ،الخزامه وحشيشة مريم ملاح لكل انواع الالتهابات الجلدية والمهبلية ، البصل مليح كيكون نئ للدورة الدموية.

Chahrazed :الرند مليح للسكر و ضغط الدم.الروز ميري الحلحال مليح للدوخة....