سلام خياتي راح نتزوج و نروح دار العائلة انصحوني كيفاش ندير كيفاش نتعامل وربي يفرح كل وحدة
Karama :إذا درت خير فيهم يعني نظفتي غسلتي طيبتي زرتي...
دريه لوجه ربي فقط ،لأنه مهما سمحت روحك وعاملت الناس بالحسنى راح يردوه بالخايب بسبب الغيرة.
إذا كانت عائلة زوجك فيها سلفات وطفلات بزاف راح تعاني من الحسد لي راح يدروه في شكل نقد على كل حاجة زينة درتيها.
شوفي أم وأب زوجك على الراس والعين احترميهم قدريهم ،فرحيهم ساعة ساعة بهدية ولو كانت بسيطة راح يفرحوا بيها وإذا غلطوا فيك ما توجههمش وعامليهم بالحسنى.
احترمي كل فرد في العائلة وديري الخير ولي غلط فيك وكلي ربي.
شوفي سرك وسر زوجك إياك أن تخرجيه لأي أحد وكذلك الأشياء الجميلة والممتعة أو المشاكل بيناتكم خلها في غرفتكم الخاصة لأن الناس لا ترحم.
Rahaf :شوفي حبيبتي نصيحة مني كمجربة وأخصائية اجتماعية في آن واحد وأول حاجة لازم تديريها هي :
- ترسمي الحدود: قوليلي كيفاش؟
لازمك انت وزوجك تديرو حدود للتعاملات بيناتكم ومع الأهل... مثلا كيفاش يتعامل معاك قدام أهلو؟ والخدمة تاع الدار وطريقة اتخاذكما للقرارات الخاصة بيكم .. أيضا الأمور المتعلقة بتربية أطفالكم .. الخ هذا الاتفاق يبني أساس صحيح لعلاقتكم .
ثانيا: لازم يكون عندك خصوصياتك انت وزوجك حتى واحد ما عندو الحق يتدخل فيها خاصة مشاكلكم حلوهم أنتم .
ثالثا:حاولي على الأقل مرة في الأسبوع ولفي راجلك تخرجو مع بعض تتمتعو ببعض الخصوصية بعيدا عن العائلة.
رابعا: حاولو تبعدو على الخلافات الداخلية سواء بينك وبين زوجك او مع أهل زوجك ونتي كوني ذكية في التعامل ومتربحيش العيب. نبهك لأمر مهم: لو مرة من المرات طلب زوجك رأيك في حاجة متعلقة بأهلو متدخليش روحك وماتغلطي في حتى واحد بكلمة لأنو راح يدووور عليك .
خامسا: باش تعيشي في دار العايلة لازم يكون عقلك يوزن جبل وأعصابك حطيها في الثلاجة وتعلمي أسلوب التغافل والتجاهل بصح ماشي معنتها تطيحي بروحك لااااالا ياحنونة أعرفي كيفاش تحافظي على قيمتك ومكانتك .
Samia : حبيبتي بما أنو علابالي بزاف راح يخوفوك من دار العايلة وراح يمدولك السلبيات فأنا راح نمدلك الإيجابيات
يا حبيبتي : كي تسكني مع ناس راجلك راح تلقاي روحك محاطة بشبكة اجتماعية تحميك وتحمي أطفالك فلمستقبل لأنو أطفالك محتاجين لجدهم وجدتهم.. وحتى انت راح تلقاي شكون يعاونك في تربية الأولاد ويعطيك الخبرة تاعو.
وكي يغيب زوجك متحسيش بزاف بيسك راكي مع أهلو.
الأهل تاع زوجك راح يعاونوك تفهمي وراجلك راح يحترمك قدام مواليه.
اذا كسبتي قلب عجوزتك راح تحب أطفالك وتعاونك فيهم .
زوجك ما راحش يسهر برا يخاف من الاهل.. وأسلوب الضرب راح يخاف يستعملو والأهل كي تكوني مليحة معاهم ما راحش يخلو وليدهم يطلقكفي حال صراو مشاكل. راجلك راح يكون قدام والديه يبر بيهم ويتهلا فيهم يرضاو عليه واذا رضاو عليه رضى ربي عليه وهكا تكونو رابحين الجانب الديني والأطفال تاعكم فلمستقبل يعاملوكم كيما عاملتو جدهم وجداتهم.
ولكن هذا مايلغيش بلي أهل الزوج راح يحاولو يتدخلوبأي شكل من الأشكال وهنا لازم زوجك يكون ذكي ومحنك وانت كذلك ويفهم أهلو أنو كاين حدود ملازمش يتدخلو في علاقتكم بلعقل بلعقل وظك يفهمو.
وثاني الزوجين أحيانا كي يعيشو مع العايلة ما يتحملوش مسؤوليتهم كاملة سواء فلمصروف ولا في تربية الأولاد ولا في شغل البيت يعني لازم الواجب تاعكم تديروها باش تتفاداو الصدامات.
ولا مانع من تقديم بعض الهدايا لأهل الزوج باش يحبوكم ويتهلاو فيكم وتحسسيهم بلي راكي بنتهم وراكي مابعدتيش وليدهم عليهم.
عاوني زوجك على بر والديه تربحي أجر.
هذي هي وربي يهنيك واذا كاش ما نسيت يزيدوه الأخوات لمجربات في تعليق على هذا الموضوع .
Racha :حنووونة المعيشة مع أهل الزوج صعييبة والله ماني ساهلة تقولشي راح تفوتي لارمي.. ماترقدي كي الناس ما تصيبي راحتك وزيد بناتهم لمزوجات هذي رايحة هذي جاية بولادهم الحس في الدار منحكيلكش.. تسيقي من يلبزو من ،نهار كامل فلكوزينة تطيبي واذا عندك بيبي خلات عليك لازم تديري الشغل واذا بكى متقدريش تسكتيه ولا تخلي الشغل وتريحي مع ولدك.
المهم تسخفي على حاجة توكليها لازم تذوقي العايلة كامل عشرين واحد ولا ماكيش مليحة. تحبي تخرجي لازم تشاوري العايلة كامل وتقولي وين راكي رايحة الخصوصية مكاانش.
يتدخلولك في تربية ولادك يوليو هوما يربيو بطريقتهم وانت تتفرجي وتنطقي تقولك العجوز انت بنت لبارح راح توريلي أنا لي جبت راجلك وربيتو وجيتي نتي لقيتيه واجد؟،
واش نزيدلك العزيزة .. يشريلك راجلك شكارة شيبس تاكليها تنحي السخفة يسمعو الكاغط يكشكش يصبحو قاع مشنفين عليك راهي تاكل وتخبي... ونهااار تتوحمي يا لحنانة واحد لا يساعفك لازم تنوضي تطيبي وتنظفي وانت فلموت ولا مكيش مليحة وكي تمرض العجوز انت تهزيها وكي تمرضي نتي يقولو اديها لأمها أولى بيها هي ترفدها.
نهار يشريلك راجلك قندورة تشبعي تشناف وخبيطتاع لبيبان وتسمعي في يماه تغني منهيه من الدمار والقلقة يا أنا وليدي جبتو وربيتو وهي داتو وتلعب بدريهماتو يااا
ونهار العيد اذا ذبحتو كبشكم تاعهم يخبوه وتاعك يسموه يتحمر ويتجمر ويتقلى ويندار قديد ولي جا معروض عليه
المهم بالمختصر المفيد دارك وحدك أريحلك والله يا لوكان تكري كوانة تتهناي فيها خير من الهم والميزيرية تاع العايلة
العيش مع العائلة يحتاج رزانة وإعمال العقل ربي يكون في عون لحراير
ردحذفاميين ياربي
حذفدار العايلة في وقتنا صعيبة ياسر ياسر
ردحذففعلا.. ورغم هذا مزال كاين الخير
حذفالسكن مع العائلة ندفع ثمنه نفسيا نحن وأطفالنا
ردحذف