#رسالةــعضوة
اختي الله يسترك حطلي هاد الرسالة. حسيت بالفشل. بنتي 14 عام. راها تخونلي دراهم هدي شحال من مرة وانا نقبطا شاريا صوالح بلا خبري
حسيت بالفشل و العيا و الانهيار. تربينا في الحرمان والفقر و الله جامي نعقل روحي شريت حاجة تاع وقتا و حمد لله تربينا تربية صحيحة جامي خممت نخون يما و با و بنتي واسم ندير معاها راني فاشلة نيشان و عيانة....
Fatima :نقولك حاجة وحدة ختي راها في مرحلة حساسة وهاذا ما يبررش عملتها بالعكس ولكن كل انسان في هاذ السن يحب يكتسب شخصيته ويكونها وحده واي حاجة يديرها تولي تبانله هو الصح ولوانها غلط
اما بالنسبة نتاع حنا في وقتنا كنت نقولها قبل بصح درك نحيتها تعرفي علاه على خاطر تأكدت بلي وقتنا وقتهم ماشي كيف كيف كيما حنا في وقتنا مكانش المغريات بزاف وتكنولوجيا بزاف كانت حياة بسيطة وعايشين على حسابها وتأكدي من حاجة انو وكان عشنا حنا في وقتهم نديرو كيما راهم يديرو على خاطر كيما قتلك اي انسان في هاذ لعمر يحب يجرب اي حاجة هوما راهم عايشين مع المجتمع ويعاندو ويشوفو ويدرو وفي هاذ الحالة ماعايك غير الدعاء الالتجاء الى الله هو لي ينور طريقها مع شوية هدرة منك شوية مصاحبة عطيها مرات وحدك شوية مصروف هاكا بلاك تتعلم ربي يقدرك ختي
Rima :قريت مرة في كتاب اب بنتو تسرقلو وكي عرف شكون لم ولادو في 4 عا طابلة قلهم شكون راه يسرقلي كامل نكرو زاد سرقت عاود جمعهم قلهم لي راه يسرق باين خصو لمصروف مالا نزيدلكم فلمصروف ولي راه يسرق يحبس زادلهم وطفلة حبست متسرقلوش وندمت ولات طم في دراهم وترجعلو وش سرقت لازم تتعاملي بحكمة
Yasmina :شاراهي تشري بيهم ؟ممكن برك تبغي تشري ماكلة وسقايط تعاند صحاباتها لازم تعرفي كيفاه تتعاملي معاها اذا حدها ماكلة هدري معاها و لومي عليها و مديلها مرة مرة قيس ماتشري سقايط برك ولا انت اشري و مديلها واذا حاجات اخرى لازم صرامة اكثر
Mima :قالك المال السايب يعلم السريقة نتي خبي دراهمك يا لوكان في عبونك مع الوقت تعرفي وعلاش راهي تديلك في الدراهم
Yousra :شوفي شكون راهي مصاحبة صحبة السوء لي دير هك الصاحب ساحب
Khadija :بالصح يااختي انا ديما نقول لكم التربية تبدأ من الصغر كنت تصاحبيها وتنصحيها باش تولي تحكي ليك كل شيئ وزيد من الصغر تعلميهم بلي السرقة حرام الكذب حرام تعلميهم واش هو الصح واش هو الغلط باش يكبرو عليها وتستعملي الحيل معاهم . أما دورك ماعليك غير تنصحيها وتفهميها بالعقل انو السرقة حرام ربي مايبغيش وماينجحكش في حياتك وزيد تسقسيها بالعقل وقولها مانضربكش غير قولي واش كنتي ديري بهم واش رايحة ديري بهم ونصحيها ومن بعد ولي حطي الدراهم وشوفي لكان تعاود تديهم ولا لا ومن بعد إلا داتهم بدلي طريقة التصرف معاها
Nour :لا حول ولا قوة إلا بالله
لازم ماتستهنينيش بالأمر السرقة حاجة كبيرة لازم تعرفي وشراها تشري بيهم او لمن تمدهم؟! خاصة إذا كانو دراهم كبار
لازم تهدريلها أنو ديننا الإسلامي نهى عن السرقة:"لو أن فاطمة بنت محمد سرقت لقطعت يدها"
ربّ يهديها ويهدي بناتنا ويسترهن الوقت هذا صعيب ربي يقدرنا على التربية الصالحة
Fadila :لا حول ولاقوة الا بالله العلي العظيم
صعابت التربية في هذ الوقت ومع هذا الجيل الله يكون في عون الوالدين ويقدرهم على هذا الحمل الثقيل..الدعاء اختي ثم الدعاااااء توجهي الله وادعيه يااارب استودعتك اولادي انا لا املك القدرة على تربيتهم وحدي وانت القادر على كل شيء وبيدك كل شيء فوجههم لسواء السبيل وابعد عنهم شرور انفسهم وشرور الماكرين وارزقهم الصحبة الصالحة الطيبة اني يارب عبد ضعيف وضائع ولا حول لي لي ولا قوة اتوجه اليك بكل ضعفي وقلة حيلتي فدبر امورهم انت خير المدبرين🤲🤲🤲 ادعي في سجودك وفي التهجد في كل صلواتك ودوك تشوفي قدرة الله سبحانه
Hanine :اهم شي قليلها ثقتي بيك كبيرة بنتي الفحلة نحبك تعلمي خاوتك المبادئ والقيم الأخلاقية مثل الكذب والسرقة والكلام البذيء متبينيش بلي تعرفي لأنها من بعد تحطك في أمر الواقع وممكن تعاسرك إذا منفعتش استعملي القسوة واصعب شيء متهدريش معاها وفهميها علاه .ربي يجيب الخير.
Farah :أشبعي حرمان ابنتك من الحلوى واحتياجاتها
Rahaf :كان عندي نفس المشكل مع بنتي خطرة قلتلها رايحا نشريلك ڨاع واش تحبي من بعد خليتها كتبت ورقة بكل احتياجاتها من الاهم ال اقل اهمية شريتلها اهم حاجة حبتها او اعطيهالها من بعد خبيتها او قلتلها سرقوها او هادوك لي كتبتيهم منشريهملكش كذبت عليك .من هداك النهار فهمت بلي ماشي مليح السرقة و الكذب . منين داك تغلط او تعاود ترجع لعقلها.
Dima:كاين واحد المثل يقولوه على واحد سرق الابرة كي كان صغير وداها ليماه تخيط بيها ويماه شدتها عليه وفرحت بيها هو حلاتلو كي شاف يماه فرحت قال راني ندير في حاجة مليحة لحق لعيد راح سرق كبش حكموه داوه للحبس كي قعد فالحبس تفكر بلي يماه هي سبابو قعد يقول إيييه لوكان نهاتني يما على الابرة ماتصرا فيا هاذ العبرة. يعني الخلاصة لوكان يماه ماشدتش عليه لبرة يفيق بلي هاذي حاجة ماشي مليحة ومالازمش يعاودها بصح المشكل يماه فرحت بيه
Hiba: لازم عليه كأم الهدوء أولا ثم محاولة معرفة السبب علاش راهي تهزلك دراهم؟
لازم تريحي مع بنتك تفهميها بلي هذا سلوك مشين ماشي مليح مالازمش يتكرر.
شوفي شكون صحاباتها والسلوك تاعهم.
Asma :احكمي قعدي ولادك كل و احكيلهم حكاية على السرقة حكاية توصليلها بيها الميساج بلا ما تقوليلها راني فقت بيك و في نفس الوقت خبي دراهمك وين ما يشوفوهمش و تعلمي حاجة قداه تخلصي ولا يخلص راجلك واحد ما يعرف الرقم و لا وقتاه يجيو حتى اولادك مع الوقت هادا الدراري يوليو يحسبولك و تعودي ما تنجميش تتحكمي فيهم و ديما ديما اعملي وقت خصصيه لولادك احكيلهم عل القيم على ربي وش قال ربي علاماه نها كل مرة قصة تعملي باها تذكير و ناقشيهم بربي نشالله تداركي الامر يمكن تكون مش قصدها السرقة بمعناها يمكن حبت الشعور تع عندها دراهم في يدها كيما تشوف في لبنات معاها يمكن عندهم مصروف انت شوفي معاها عودي خصصيلها مصروف قيمة يعني ما تنجمش تشري باها حوايج خاطيين الطريق و اعمليلهم شقشيقة تتعلم تخبي من صواردها باه تعرفي وين تعمل بيهم هاداك المصروف الي راكي تمديلها فيه
Faracha : إذا تكرر هذا السلوك لازم طبيب نفساني لابنتك
سلوك السرقة هو تعبير عن خلل ما في معاملتك لابنتك أنت أو أحد المقربين منها.. ربما هي تحاول سد فجوة ما سواء مادية أو عاطفية تعاني منها... حاوري ابنتك وحاولي ان تفهمي الأسباب التي دفعتها لهذا الفعل ومن ثم قرري بعض القرارات لمعالجتها
ردحذفأحسنت
حذفلو أن فاطمة سرقت لقطعت يدها
ردحذف