سلام أخواتي..
مالقيتش منين نبدا ولا واش نقول..
باختصار التحاليل أظهرت إصابتي بالسرطان
ماذا افعل؟ معرفتش كيفاش تتصرف انصحوني ربي يحفظكم.
Hala :ما تخافيش حبيبتي داوي وترتاحي باذن الله تعالى وتعياي هنا تفرحي وتفرحينا نعرف وحدة رتاحت منو وزادت حتى ولدت سبحان الله قادر على كلش
Farah :ان شاء الله تكوني اكتشفتيه مبكرا نعرف بزاف الي براو عادي استأصلو الثدي وراهم عايشين والحمد لله لا تقنطي من رحمة الله ختي، علبالي مشي ساهلة بصح ديري ربي في بالك والساعة كي تلحق حتى وماتكونيش مريضة، ربي يخفف عليك ويشافيك ان شاء الله
Lina:لاحول ولاقوة الا بالله ربي يشفيك ويعافيك يارب قوي ايمانك بالله واكثري من الدعاء و الصدقة لأنه تدفع البلاء خير الصدقة إطعام الطعام هي افضل صدقة
Yasmina:ربي يشافيك حنونتي ويعافيك قولي الحمد لله راه ابتلاء من عند الله والله حنين كريم راح يكون على قدر البلاء على قدر عطاء الانسان لازم يتادب مع عطايا الله سواء مرض اوفرح اوقرح لازم تكوني شكورة ومكاش انسان قتلو السلطان كل انسان يموت باجلو انت امرأة مومنة وحنونة وراح تصلي وتشكري ربي على النعمة قومي الليل وصلي وادعي راه دعاء يغير الاقدار حنونتي كوراج ومتايسيش راها ابتلاء كفارة للذنوب اختي الكريمة نصيحة شدي في صلاتك وقيامك واستغفارك وراح ربي ينجيك ياحبيبة قلبي الكوراج الحمد لله انت قوية وراه تغلبيه باذن الله
Rahaf :اختي متخافي ما والو سرطان الثدي يمكن الشفاء منو بقدرة الله تعالى، بزاف ناس عالجو و ارتاحو و راهم عايشين عادي جدًا، اهم شي حافظي على نفسيتك و معنوياتك المرتفعة و تذكري ان الله اذا احب عبدا ابتلاه، راكي محظوظة الله عز وجل في سابع سماه تذكرك انتِ بالذات ليسمع صوت مناجاتك و دعاءك و لتكوني بالقرب منه اكثر و اكثر 🙏🏼
دعواتي لك بالشفاء العاجل ان شاء الله و ترجعي اقوى من الأول ❤️❤️
Fadila :هذا قدر الله حبيبتي ربي يشفيك ويعافيك
لازم تركزي كيفاش تحافظي على صحتك وتغذيتك الصحية وحسني من نفسيتك وراح تتجاوزي المرض بإذن الله
خممي فلأمور الإيجابية مهما تكن الظروف وبلي ربي يحبك ولهذا ابتلاك .
كيما قلتلك ركزي كيفاش تداوي روحك وترتاحي واستمري في ممارسة هواياتك وبعض الرياضة ولحوايج لي تحبيها وتقدري تديريها وخلي مورالك ديما طالع .
بعدي عن العزلة.. وتفكري ديما فلان وفلانة لي تعرفيهم حاربو المرض وقهروه وراهم عايشين بشكل طبيعي .
ومتنسايش أهم حاجة قوي إيمانك بربي سبحانو وتقربي منو اكثر وأكثري من الدعاء فهو يغير القدر والصدقة مجلبة للشفاء.. والجئي للطب النبوي والاستشفاء بالقرآن الكريم
راح تحسي براحة نفسية ورضا .
اللهم رب الناس أذهب البأس واشف أنت الشافي لا شفاء إلا شفاؤك شفاء لا يغادر سقما.
Basma :ربي يشفيك أختي بزاف لي ريحو راهم ملاح فقط الايمان بالقدر و الابتعاد عن كل ما يأذي نفسيا و لو كان أقرب المقربين لان هذا هو السبب الرئيسي للمرض لاني مررت بالتجربة في cavum و لازلت في فترة النقاهة و الذي لاحظته عند جميع المرضى الذين تصادفت بلقائهم هو الضغط النفسي اما الزوج او الوالدين او الابناء و حب الاخرين اكثر من النفس
حبي روحك ربي مدلك المرض باش يفكرك بنفسك
Hiba:إن الله إذا أحب عبدا ابتلاه
ربي يشافيك ويعافيك ختي عليك بالصبر والاستغفار وتأكدي أن هذا الإبتلاء ما هو الا ليرفعك به الله درجات
Yousra :أسأل الله العظيم رب العرش العظيم أن يشفيك،لاتخافي أنا مريت بالحالة هاذي وشفيت والحمد لله،خلي نفسيتك مليح كثري بالدعاء والتضرع لله خاصة فالثلث الأخير، تعاهدي صدقة السر التي تدخل السرور على صاحبها،" داووا مرضاكم بالصدقات " وكثري القارص والخرشف وكل ماهو طبيعي ومر
Fatima :ربي يشفيك ويعافيك ان شاء الله المرض ابتلاء من عند الله لذا عليك بالصبر والصلاة والدعاء ولا تستهيني بالدعاء فهو يغير الأقدار بإذن الله ويحتسب لك عند الله أجر وثواب إن لم يكن ما تريدي، واجعلي الله هو سندك في الشدة والرخاء ثم أهلك لأن الداعم الأساسي بعد الله هم الأهل، وربي يفرج عليك ويشفيك ان شاء الله😌
Wahiba : اختي ربي يشفيك و المرض ابتلاء و ربي كي يحب عبد يبتليه اقعدي مع عائلتك اتعلمي حاحة جديدة كوني متفائلة روحي صلي و استغفري اتقربي من والله يا اختي غير تحسي روحك مليحة و تحسي بالحب تاع ربي تحسي روحك انسانة هايلة انا كنت نبكي معندي حتى واحد لي نفرغلو ونحكي معاه كنت نبكي من الوحدة و الفراغ من نهار رجعت طريق ربي وليت منحتاج حتى وااااحد ربي يشفيك اختي و متقلقيش روحك
Sabrina :اختي توكلي علي ربي.متخافيش .لكل داء دواء ودروك العلم طور وبكري كان هذا لمرض يخلع دروك راهم يريحو منه.ياااا ما اطفال كانو مع بنتي ورتاحو .سرطان دم .لي بشيميو وريح ولي بشيميو وبزرع نخاع ريح .وخرج كونطرول .كبري أملك بالله والشفاء من عنده .أكيد شيميو يضر لكن يكمل يكمل .اللهم شافي مرضئ المسلمين
Fadila :قال رسول الله صلى الله عليه وسلم<<داوو مرضاكم بالصدقة>>ربي يشافيك
Nour :عجوزتي راهي هكذا دارت عملية و مور عملية لاشيمي 6 حصص و درك راهي لاباس عليها وشعرها ناض
بصح لازم مور العملية ماتتعبيش وماتخدميش يدك على أقل 6 أشهر ربي يشفيك وكوني قوية وعندك إرادة عجوزتي جامي قالت أي عندها القوة وإرادة هاهي برات أتكلي ربي وزدمي ف علاج ربي يشفي كل مريض يتألم يارب العالمين ياارحم الراحمين.
وادعولي بالشفا
Mariem :انا مريضة بالسرطان و راني عايشة حمد لله المهم تبعي واش يقول الطبيب و النفسية تكون طالعة و الابتعاد عن القلق و تبعي ريجيم اكل صحي و المداومة على الكنترول عند الطبيب و ربي يشفي الجميع كاين ناس براو نهائيا حمد لله
Hanine :أستاذة خدمت معاها جاها سرطان في نهاية الانف وبداية الحلق اكتشفولها طبيب الاذن و الانف والحنجرة والله العظيم كنا في كل زيارة ليها نقولوا هذي النهاية لانوا كان في مكان حساس جدا لكنها وقفت مع روحها وواصلت العلاج بالاضافة الى العسل وبذور الطلع والريجيم واليوم راها الحمد لله بصحة جيدة ربي يدومها عليها يااااارب. رجعت للعمل بعد رحلة العلاج لكن في الادارة فقط لانها لا تستطيع رفع صوتها والشرح المطول للتلاميذ لانخفاض صوتها وتاثر الاحبال الصوتية واليوم الحمد لله ربي يحفظها لوليداتها .القصة عندها تقريبا عشر سنوات وهي لليوم عايشة وتعمل بجد ونشاط
Jouri:الأعمار بيد ربي انا مر على مرضي 10 سنوات واليوم الحمد الله راني مع الكونترول ربي يشفي كل مريض
Rima :بصفتي مريضه سرطان ربي يشفينا كاين بزاف حالات ارتاحو بعد 5سنوات خاصتا سرطان ثدي مهم قوه اراده اهم شي دعاء والله كانو يعالجوا معيا ارتاحوا كملو حياتهم بعد استصال مرض اختي عارفه حسا بيك مجربه عذاب نتعو ربي يشفينا اختي مديريش في باللك سرطان يقتل اجل انا عايشيه منه حمدلله تقبلت وضع حمدلله
Wahiba :عجوزتي عاشت 20سنة من بعد ما نحات الثدي وكان maligne وداىت الراديو تيرابي والشبميو ورحعت لباس عليها عمي تع الدم راه في قريب 7سنين زمن وراه بعتم ولا زادلو تع البروستات ومشالو في تلعظم والحمد الله يارب دار راديو تيرابي وراه مع الدوا لباس عليه بابا دارها عندو عام ونص الكولون وخبيث نحا مورصو ودار الشيميو وراه الحم الله ماشاء الله عليهم كامل ربي يرزقهم الصحة و يشفيهم اهم شيء التشخيص المبكر هذوا كامل فاقولو على البكري يارب شهر ولا
شكرا بارك الله فيكم على الكلام الجميل جدا ❤
ردحذف