واش قالو النسا في الجزائر على طريقة التعامل مع البنت الثرثارة كثيرة الكلام وتسهر ولا تنام مبكرا.
حا نهبل عندي بنتي 5 سنين تنوض تهدر ترقد تهدر ماما ماما ماما ماما شوفي شوفي تحكي تحكي سورتو كي نحكي مع باياها ولا هاوتها ماما نقوللها اه تقولي اه نسيت شا نقولك و كي تجي ترقد كون متاخذش طريحه مترقدش نطفي كلش كل راقدين هي تبقا تمتم وخذها وتتقلب انا نقول صاي ضك تحبس ساعه نص ساعه نوض ليها نضربها باش تحبس دير ازعاج كبير خاوتها تنوضهم لمهم نقوللها ريحي كي لعباد تبقا غير تتقلب تتقلب و تبدت تحسب 1.2..حت ل 100 و من بعد تبدا تكتبهم في الخيط بصبعها نا صتي نفذ صبري نضرب ارقذي 20دقيقه نڨرصها ارقذي والله والو حتان نوض نضربها تاع صححح بثم باش ترقد والله مفهمت زعما طبيعيه
Karama :ههههههه كي نشوف التعليقات نتشوكا تقول راهم كامل عندهم شهادات تخصص
بنتك يا اختي تحوس على اهتمامك وفقط وكون جيتي ذكية ما تضربيهاش تحاوري معاها وما تهمليهاش وكي تجي ترقد ساميها ليك وحضنيها وهاو وجهي كان ما رقدتش
راها عندي اختها في الدار وكنت نضربها ومن بعدفهمت بلي مسكينة تحوس تتقرب ليا والله من غيرت معاملتي معاها تغيرت
حنا الامهات في بعض الأحيان لازمنا تربية باه نفهمو ولادنا
Nassima :عندي زوج نفس حالتك بسلامتهم ربي يباركلي فيهم و يحفظهملي ، و قلبوني نهرف و سونزاري كيفهم 😂😂 بصح الحمد لله مغتنمة الأمر لصالحهم ❤ حفظيها قرآن و العفسة تاع رقاد الليل حتى انا كنت كيفك ، المشكل كل ليلة يخرجولي بهدرة جديدة يقولولي حتى ماما شكون بنتر الدار و نتي مامانا ولا ختنا و زيداتك ماماك من كرشها ولا لقاتك في السبيطار 🤦🏽♀️
نعيط نندب على راسي نضربهم نطفي التيلي .. والو ، وليت نجي بيناتهم و نقعد نهرف معاهم و نحكيلهم و نراجعلهم سورهم لي حافظينها و نلقنهم بعض الكلمات الأجنبية و نجاوبهم حتى على أسئلتهم لي راسي يحبس منها .. و متتصوريش الفرحة لي يفرحوها و كي يبداو يحضنو فيا و يسلمولي على يديا😭😭
و ما تلحقش الربع ساعة و يغفاو كتاكيتي ❤
متزيديش ترقديها على بكية ... تواصلي معاها قلبا و قالبا فيها التعب فيها و ارسمي لبنتك ذكريات جميلة راه هذا ماضيها إذا كنا من الأحياء و طول ربي عمارنا
Hadil :علاش تضربيها يا ختي ربي يهديك هادي حاجا يضربو عليها بسلامتها تحب تهدر و ناشطة و روحها خفيفة خليها تهدر و بالعكس ضميها ليك و حكيلها حكاية ضرك ترقد نحي عليك الضرب يا ختي يهديك ربي مسكينة مادارت والو باش تعنفيها هكاك صغيرونة متفهم لا للرقاد لا للصمت لا للازعاج ..ديها قد عقلها و اهدري معاها خلي تفرغ طاقتها كاملة ..ربي يحفظهالك مزهية عليك دار
Samia :اذا راهي طفلة وحدها و ماعندهاش مع شكون تلعب شوفيلها طفلة من بنات الجيران يلعبو معاها والا انت مقلقتك المسؤولية و التعب تاع الدار ماتتحمليهاش الدار ماشي هاربة خليلها وقيت العبي فيه معاها والا اسمعيلها برك و تحاوري معاها لوكان في التوافه والا ماتخرجش و ماعندهاش مع شكون تفرغ طاقة تاعها مسكينة وانت ماكيش عاطيتها وقت و الوقت الكل للدار و أولادك لاخرين....والله غير حرام عليك تجيبوهم و تحبوهم صم بكم...و بالنسبة لي يقلك مريضة و عندها توحد نقلكم بلي غالطين هاذوك يجو انطوائيين و ساكتين و مايحبو لا يلعبو لا يهدرو لا والو ....باينتلي انت لي مشك عادية والله ننصحك اجبدي بنتك ليك و انسي الحاجة لي مقلقاتك فاها و نحي الضرب لأنها راح تتعقدلك و تكرهك فرات.
Lila :علميها دعاء النوم تقراه قبل ماترقد وسور قصيرة اقرايلها انت وتعاود.من وراك من جهة تحفظهم ومن جهة ترقد مستراحة وبلا ماتبقا تحسب قلها اقراي قران وربي يحفظهالك ان شاءالله
Hanine :النعاس مايجيش بسيف وقتاه تفهمو بلي سلوك الطفل يختلف عن الراشد تحتميها تقعد في فراشها راني معاك أما ترقديها بسيف هاذي لعقل ومايتقبلهاش 😤😤 وزيد تضربيها 😦😵 جربيها في روحك تكوني باغية ترقدي بصح مايجيكش نعاس واش تديري تعيطي لراجلك يضربك ؟؟؟ هذي هي طريقتها باش ترقد روحها خليها على راحتها وانتبهي لماكلتها قبل ماترقد وعاونيها بتيزانات وإلا أنشطة بدنية تعبها هذا حلها
Nadjet :بنتك هذي كيما انا كي كنت صغيرة لدرك نتفكر هم يرقدو كل ة أنا نبات حية الله غالب نومي صعيب مي ماما الحمد الله صبرت معايا تقرالي قرأن ساعات تحكيلي و درك اني ام و عندي بنتي نومها صعيب بصح الضرب ماش حل . بنتك ماش دير فيها بالذمة مام هي الله غالب عليها
Hiba :عندها حركة مفرطة تعبيها فالنهار ولا علميها تكتب ولا ترسم ديك الطاقة وظفيهالها في حاجا مفيدة ولا دخليها جامع .حالة عادية
Lamia :بنتك لاباس بيها احمدي رب خمس سنين ترقد وتحسب وتكتب راهي تراجع وهاذي طفلة ذكية وعندها طاقة كبيرة نورمالمون انت تستغليها لصالحها راكي تثبطي فيها بالضرب والمنع اسمعيها وخليها تفرغ واش عندها مافيها والو هكذا خاوتها يتعلمو منها وهي تطور انت قدمي وقت النوم ديريلهم قصة فلاتيلي نضن راهي ترقد فالنهار ولا علابيها تقدر تقاوم النوم ولا اعطيها مسؤوليات خفيفة خلي باباها يخرجها تفرغ الطاقة فالمساء تتعب وترقد بالخف وانت ثان اصبري على ولادك ولا راكي فاهمة بالي الولاد الاخرين يخطو راسهم يرقدو راكي غالطة انت قلتي 20دقيقة يا حسراه راكي هايلة انا ولادي يجيبو ساعة ولا ساعة ونص كي والو ونبقى معاهم كان نخطيهم والله مايرقدو للصباح
Lamia :اذا عندك اطفال أقل منها راهي تقلك اني هنا بطريقة غير مباشرة وين بلاصتي وين اهتمامك بيا واكيد قل اهتمامك بيها من كترة تعب تاع خوتها صغار شي لي تعمل فيه وليتي تشوفيه امر مزعج رغم انو نص ولادنا هك كل دار تلقاي واحد سلوكه هك 👌ولات تعمل أمور لي ذكرتيهم باه تلفت اهتمامك .5 سنين خلاص ولات تفهم
Yousra :لبراءة وقت الراحة الذاكرة تبدأ تخرج الافكار بصح خلوهم يفرغو لفي قلبهم وعلموهم ماتخلوهمش محتارين هداوقت التعليم كي يكون يتشقألبو زيدو لهم الافكار وعلموهم القرءان والاذكار وبعد حتى تتعمر الذاكرة انتاعهم دوك يولو يرقدو من قوة التذكير ويحوصو غير يرتاحوومن بعد المرات شغليهم معاك فالدار حتى يتعلم ويرقدو لك كما هاك البراءة لو كان ماتشغليهم يشغلوك مايخلوكش ترتاحي ولو دقيقة حتى تطيحي فراش ومازال مايخلوكش ترتاحي عندهم طاقة يبغو يخلصوها وهاد احنا تأدي بنا حتى الموت وهما الاطفال مخهم خاوي مش كفنا احنا الكبار مئة مشكل مئة حاجة ومئة عمل عندنا نقضوه وهما عندهم العب والأكل برك هادي حياتهم الخاصةبيهم سبحان الله
Yasmina : يا اختي مادام لاحظتي بلي بنتك حركية بزاف وثرثارة لازم تاخذي قرار تديها لطبيب نفسي ولا أخصائي أطفال وهو يوجهك هكا تنحي الشك تماما . الملاحظة الوحيدة الضرب خطأ مسكينة ماتخليهاش ترقد بدمعتها غاضتني صافي راهي يوميا ترقد تبكي ترقد زعفانة مانعرف واش تقول عليك قبل ماتديها عينها . على الاقل جربي مرة حضنيها احكيلها خليها تردد موراك آيات قرآنية حتي تنعس وترقد
البنات كلهن في هذا السن يثرثرن هذا دليل على نموهن بشكل طبيعي
ردحذفساعفي بنتك غدوة تولي مرا وتتفكرك وتدعيلك بالخير
ردحذفاعرضي بنتك على بسيكولوغ باش تنحي الشك اذا قالك بنتك طبيعية معناها لازم تهتمي بيها وتتهلاي فيها ومتعنفيهاش باش تكبرلك انسانة سوية
ردحذف