واش قالو النسا في الجزائر على الطريقة الصحيحة للتعامل مع البنت المراهقة التي تكلم الشباب دون علم أهلها!
سلام من فضلكم انصحوني كيف أتعامل مع بنت في 14سنة خلوقة نجيبة لكنها تتواصل مع زميلها في الهاتف شغل علاقة حب كيف أتعامل معها والله ملقيت كيفاه نبداهالها
Hala:علميها انو هذا حرام وهي راهي في سن التكليف يعني راح تأثم من فعلها
Fadila : لو في يوم من الأيام صبتي بنتك لي راهي مراهقة تكلم شاب خفية عليك واش هي الخطوات الصحيحة لي لازم تتاخذيها ؟
تبعيني حبيبتي مليح :
اول حاجة لازم تضبطي أعصابك مليح كيما يقولو حطي أعصابك في الثلاجة لأنو العنف ورد الفعل السريع والمتسرع راح يجيك بنتيجة عكسية .
ثانيا حبيبتي لازم تسمعي لبنتك مبعد هي ثاني تسمعك
حاولي أن تدركي أنو الظروف لي عشتيها نتي والزمن لي تربيتي فيه نتي والأساليب لي تربيتي بيها قد لا تكون ناجعة مع هذا الجيل وعلى هذي لازم تخدمي عقلك في طريقة التعامل معاها وتحاولي تخليها تتكلم ونتي تعرفي مدى عمق العلاقة لي بيناتهم ومدتها.
فهميها بلي مزالت صغيرة وراح يجي نهار لي يكون عندها سن مناسب وشخص
مناسب وعلاقة في إطارها الصحيح والشرعي وأنو العلاقات خارج الإطار هذاك حرام ومرفوضة رفضا قاطعا.
فهميها أنو انت أمها وصديقتها وأقرب إنسان ليها وأنو سعيك كلو في مصلحتها
في المقابل شغليلها وقتها بممارسة هوايات وتحفيظها القرآن ومطالعةالكتب المفيدة.
Khadija : شوفي ختي لعزيزة الموضوع هذا حساس بزاف ولازم تحاولي تتعاملي مع بنتك بشكل سليم ..
أنا نظن أنو أسلوب اللين لا يأتي بمنفعة لذلك وجب عليك النصح والارشاد وأن تشددي لهجتك وتهدديها إذا ماتوقفتش على التصرف هذا راح تخبري باباها ويكون العقاب شديد.. وقادر يحبسك على الدراسة . المهم نتي استعملي أسلوب الترغيب والترهيب وفهميها أنو العلاقات هذو يجيبو غضب الله عز وجل وفي المستقبل يشوهولك سمعتك والناس ولي يحب يتقدملك ويعرف عليك لحكايات هذو يبطل عليك.
Wahiba : علمي بنتك أنو العلاقات هذي محرمة وربي ماهوش راح يرضى عليها اذا استمرت فيها ولازمها تتوب .
وبعديها على رفقة السوء وأكثري من الدعاء وبإذن الله يصلحها ربي
Fatima :أنا راح ننصحك بالاهتمام بابنتك أكثر إنت والناس المحيطة بيها.. أشعريها بالحب ولبي احتياجاتها في المعقول .. قويلها ثقتها في نفسها وغيريلها الوسط لي راهي تدور فيه خاصة الصديقات .
رسخي في المبادئ والأخلاق الطيبة.
Nassima :مفهمتش كيفاه 14سنة مدايرتلها تلفون راسي حبس سي نورمال تولي تخمم فأمورات خرين نسا كبار بعقولهم ومزوجات دارو كوارث من ورا هاذ التلفونات كيفاه تهدري على طفلة صغيرة راكي تدي فبنتك للهلاك
Rima:بكري قرينا بلا تلفون انا حتى كبرت وطلعت لجامعة باه درتو في أول يوم في جامعة والحمد الله لي مداروهليش تلفون يتلف راي في هذا السن قوليلها كي تجيبي لباك نشرولك واحد زين وجديد
Mariem :ادا بنتك تواجهيها و تقوليلها بلي خانت الثقة لي بيناتكم و باي هادي علاقة محرمة علميها الخوف من الله و رقابته علينا تعطيلها خيار ان لا ثالث لهما يا تيقن روحها و تعاود تكسب ثقتك و تنحي كامل هدا الخرطي من تلفونها و تركز عل قرايتها صلاتها قرآنها يا تحط التلفون عندك ما تزيدش تشوفوا. التلفون يبات عندك مهما كان تروحي تسقسي عليها دايما وين تقرا يمكن راهي تتلاقاه. حطيلها الحدود لي مالازمش تفوتهم. تتعداهم تتعاقب كوني صارمة في أمور الدين ما تتنازليش
Hanine :انا شخصيا كون جيت في بلاصتك نعرف طفل هذا شكون نتواصل مع والديه نهدر معاهم باش يجبدو وليدهم علي بنتي و نهددهم بلابوليس نحيلها هذاك تيليفون نبيعو ونزيد عليه ونشري ميكرو نحطو في لبيت للجميع لي حب يقرا هاو ميكرو مكاش خصوصية و نهدر مع بنتي و نفهمها بلي هذا سن تاع تركز علي قرايتها مزالها صغيرا علي هاذ شي وبلي حرام و مايجوزش و منسحقش نشوف هاذ تصرفات و نتابعا من بعيد و نتهي
Kamar :المشكل هو الهاتف و الفيسبوك و لوتساب مدام حلتي عليها ابواب الشر فالنتيحة واضحة الله يصلحها و يصلح الوالدين و الاولاد
Maroua :بنتك راهي في سن حرجة وزيد تشوف البنات وواش راهو صاري في المؤسسات نت صاحبيها واعرفي كيفاه تنصحيها خير من اسلوب العقاب لي يخليها تفلت من ايديك هادا رايي الشخصي
Fatima :شوفي لو انتي من زمان من كانت صغيرة ونتي تقوليلها هذا شي حرام وهدا حلال متوصلش هذا شي كامل واهم شي تهدري معاها وتحدثيها كل يوم وتصاحبيها وتعطيها امثال اعليك تقوليلها انا كنت كذا كذا طفله تحب تعاند يماها وربي يهديها و يهدينا ويهدي كل امة محمد صلي الله عليه وسلم
Basma :شوفي اخت عن تجربة نحكيلك وعلي نفسي صدقيني هذا سن صعيييب بززاف سيرتو لادخلت في علاقة مع الانسان واذا عاقبتيها راح توليللها عقدة نفسية متروحلهاش طوول لعمر وزيد تكرهك بينها وبين نفسها الانها راهي تشوف فيك نتي الانسان لوحيد وقريب ولي راح تفهميها لازم تقربي منها قدرر مستطاع والله غير تدخلك في ازمة نفسية تولي تعاني نني ويها وكل يوم وكل ساعة وكل دقيقة تولي ذكرك لهذا شي لازمك اوقفي مع بنتك كل يوم اهدريها بشوية تفهمك وتكسبك كأم ..
Lila :علاه هكا ما تضغطيش عليها ادا راهي جايبه روحها في القراية حاولي تحكي معاها بلي هكا غلط وبلي الحب مش حرام احبي كيما تبغي ولكن لما يجي الوقت المناسب والشخص المناسب ومالازمش تتجاوز الحدود من الاخير كوني صاحبتها اللي تنصحها وتسمعلها الهدرة بلا عنف بلا تجريح بلا كسر الثقه واستعملي اسلوب القصص المباشره كأنك انتي عشتيهم والاهم شوفي صاحباتها شكون
Hiba :نحيلها تلفون بطريقة غير مباشرة
جربي فسديه نتي بكانش عفسة دبراسو خسريه وما تخسريش بنتك و دوه الخدام ومبعد قلها راه حبس كامل ما يتخدمش واشري ميكرو خلي تقرا بيه ونسيها في تلفون وديما عسيها
Maria:نصيحتي ليك، اولا لازم تتوجهي لربي باش يعاونك في تربيتها وادعيه وتقومي ليل باش بنتك ماتنحرفش، ثانيا قوليلها بلي راكي عارفة بهاذ الموضوع وحسسيها بلي دارت حاجة كبيرة وقلها صاي ثقتي بيك راحت وبدلي علاقتك معاها ولي جافية شوية باش تحس بلي دارت غلطة، وتلفون بيعيه وتاعك ديريله كود، وعليك بالدعاء
Salima :هذا ڨع نتيجة الدراسة في الاختلاط والله المستعان، لوكانت عندنا مدارس البنات وحدهم والأولاد وحدهم نطمئنوا على بناتنا لكن للأسف رانا نقلدو في الغرب
وحكاية المراهقة هذي مكانش منها في ديننا، كاين مرحلتين في عمر الإنسان وهما قبل التكليف وبعد التكليف، لازم تفهمها أنو أي تجاوز منها لحدود الله رآه حرام ومكتوب عليها وستحاسب عليه
أحسن شيء تحبسها من القراية وتخليها تخدم شغل الدار وتعلمها حرفة وتزيد عامين وتزوجها
علابيها الرسول صلى الله عليه وسلم قال"العجلة من الشيطان إلا في خمس: تجهيز الميت ودفنه، التوبة من الذنب، سداد الدين، إكرام الضيف وتزويج البكر"
لأنو فعلا البنت اذا وصلت مرحلة الشبق بدون زواج تولي كالقنبلة الموقوتة ما تنفعها لا قراية لا جد ماليها
ينفع تتعلم أمور دينها وفقه الأسرة وأمور المنزل وصنعة وتتزوج لتعف نفسها
Lina:تبدلها من المدرسة و تنحيلها كل وسائل التواصل الاجتماعي ورتديها و تجيبها
Karima :سبب كثرة الفتن في هذا الزمن هو الهاتف الي أصبح شيء عادي عند بزاف أولياء و خاصة الي اولادهم صغار كارثة بأتم معنى الكلمة و والأدهى و الأمر المراقبة منعدمة تمااما و الله رانا كبار و تفتنا بالتكنولوجيا الإنسان يتحكم في نفسو بصعوبة نتمنى من الاولياء يمنعو الهواتف على أبنائهم حتى و في حالة حبيتو اعملولهم طابلات مشتركة مع الاخوة كامل و تكون على أعينكم طوال الوقت و ربي يهدي ابنتك و يسدد خطاها يارب.
صراحة الانترنت فسدت المجتمع وضاعت المبادئ والتربية صعابت واختلط الحابل بالنابل .. ربي يهدي وليداتنا ويحفظهم
ردحذفربي يحفظ بناتنا وبنات المسلمين
ردحذفلما غابت التربية الدينية ظهرت مثل هذه الأحداث
ردحذف